Activist-te chuan Assam Lungalhthei khur chim avanga chhiatna chung chang chhui tih khawlai chu Ngaihthah luih vang a ni an ti.

#ZONEWS July 12, 2025: Umrangso, Dima Hasao District lungalhthei khur chhiatna, hnathawktu mi 9 lai thihna chungchang chhuina report, thla 6 hnuah pawh an la tih chhuah theih loh avangin sawrkar chu an chhuina report tichhuak thuai turin Activist-ten a nawr nasa hle. Dima Hasao District-ah hian phalna lova Lungalhthei khur siam an tam hle niin an sawi.

Umrangso lungalhthei khur chhiatna, January 6, 2025-a thlengah khan Indian Navy leh National Disaster Response force ten ni 44 zet an beih hnuah, February 19, 2025 khan ruang 9 te chu lak chhuah kim chauh a ni.

Kha chhiatna thleng avang khan Assam State sawrkar chuan a chhuitutur, Judicial Commission a din a, Gauhati High Court Justice chawl ta, Anima Hazarika hovin he commission hian hna an thawk a. Chief Minister Himanta Biswa Sarma chuan thla thum chhungin Commission chuan an chhuina report an thehluh ngei tur thu a sawi a. Thla ruk hnuah pawh an chhuina report chu peih a la nih loh avangin mi tam tak thinrimna a chawk chhuak ta a ni.

Daniel Langthasa, Sixth Schedule Protection Committee-a an Convenor leh North Cachar Hills Autonomous Council (NCHAC)-a member lo ni tawh chuan, heti tak maia sawrkarin a chhuina report a tikhawtlai hi nasa takin sawrkar a dem a. “Commission chu thla thum chhung hun pek an ni a. Thla ruk a liam tawh a, sawrkarin report engmah a la pe chhuak lo a. Thuthar engmah sawi a awm lo bawk a. Kha chhiatna thlentute kha hrem ngei ngei tur an ni a, tun thlengin hrem an la ni hek lo.” tiin a tawng na hle.

National Green Tribunal ten kum 2014 khan hetiang Lungalhthei khur an laih dan – Rat-hole mining an tih mai hi an khap tawh a, chuti chung chuan Umrangso velah hian an la chhunzawm reng a. Endik pawh a ni ngai chuang lo ni a, sawi a ni.

Chief Minister-in phalna lova Lungalhthei khur awm zawng zawng tihtawp a nihtur thu sawi mahsela, engmah hmalakna a awm a, Phalna lova lungalhthei khur laih (Illegal Minining) hi an la chhunzawm reng tho niin, Langthasa hian a sawi a ni.

Langthasa chuan, “Hei khawtlangnun buaina a ni a. Thuneitute laka beiseina a awm tawh loh chuan miten dan an pawisa lova, thil sual an tih phah thin,” tiin, he thil a mûk hle a, ngaihthah mai mai chi a nih loh thu a sawi a. Sawrkar chu commission report-te vantlang hriata puangzar thuai tur leh, chhiatna tuartu chhungkuate dikna chanvo chu hlenchhuahsak ngei turin a phut a ni.

#zonews #rampawn