Tamil Nadu ah Minister Prof. Lalnilawma khuallian a ni

#ZONEWS September 01, 2025 : Nimin khan Minister Prof. Lalnilawma chuan Mount Zion Educational Institutions buatsaih Fun Fair 2025-2026 chu Mount Zion Silver Jubilee School campus, Thenkarai, Thiruppathur, Tamil Nadu-ah Khuallian niin hun a hman pui.

Mount Zion Educational Institutions hian hetiang Fun Fair hi kumtin an buatsaih ṭhin a. Zirlaiten an thiam ang angin eitur te an siam a mipuite lei theih turin an pho chhuak ṭhin a ni. Heta an sum hmuh hi mi harsa leh chanhaite tan an pe ṭhin a ni.

Hawnna Program-ah Prof. Nitea chuan “Mihringte hian hlimna kan zawng ṭhin. Hlimna hi kan thil dawnteah ni lovin kan pekchhuah aṭang hian kan hmu zawk ṭhin a. Hetianga midangte tana luang chhuak tura inzirtirna a taka in kalpui hi a ropui ka ti a. Hetiang midangte tana luan chhuah program kan hman hian zirlaite thinglungah nasa takin a ṭha zawngin ngawng a nei ngei dawn” tih sawiin “hetiang thil ṭha tih hi i chhunzawm zel ang u” tiin kal khawmte a sawm.

Hetiang zirlaiten an zirlai piah lama midangte tana luanchhuah duhna thinlung pu tura inzirtirna an kalpui hi fakin Fun Fair buatsaihtute chungah lawmthu a sawi bawk.

Mount Zion Educational Institutions hnuaiah hian College of Engineering and Technology, College of Nursing, International School te a awm a, zirlai 12000 (sing khat sang hnih) vel an nei mek a ni.

He hunah hian Minister Prof.Lalnilawma hi Kuallian a ni a, a nupui Pi.Mary Zonunthari chu khualzahawm a ni.