KHAWVEL INSUMDAWN TAWNNAAH AMERICA THUNEIHNA LEH ROPUINA LAN TIRIN A AWM; RALTHUAM TEL LO INDOPUI A CHAWK CHHUAK. -RDI Khiangte

#ZONEWS July 15, 2025: AMERICA DONALD TRUMP CHUAN RUSSIA 100% TARIFFS LAKAH VAUIN UKRAINE WAR NI 50 CHHUNGA TI TAWP TURIN HRIATTIR A NI. ‘AMERICA FIRST’ THUPUI AVANGIN KHAWVEL CHU US THU HNUAIAH A KUN THAR CHHO LEH TA MEK.

Khawvel ram hrang hrang te insumdawn tawnnaah hian America thil tih theihzia hi Khawvelin tunhnai mai atangin a takin an hmuin an hre chho a, he Khawvel ( Planet) ah hian America ram ropui zia leh thil tih theih zia chu hmuh tura chhawp chhuah a rawn ni chiang hle.

An ram hausakna ( Economy) ah a ni emaw, ralthuamah a ni emaw, Sumdawnna Khawvelah a ni emaw, thil dangah pawh he ram ropui zia leh thil tih theihzia chu 47th US President Donald Trump hian a hre chiang em em a, US ropuina leh chakna chu tuna a term hnihnaah hian rawn lan tirin Khawvel chu a thunun mek a, ” Make America Great Again” thupui a hmangin ke a rawn pen chhuak a, an ram dinhmun siam thatna turin Khawvel ram te a rawn vau chher chher a, a thunun chho ta mek bawk.

RALTHUAM TEL LO INDOPUI :-
President Trump chuan ralthuam chelek miah lovin America ram hausakna, ropuina, thil tih theihna hmangin in sumdawn tawnna Khawvelah indopui a rawn chawk chhuak a, chu indopui lo chhuak chu ralthuam chelekna aiin ram thenkhat te tan tuarna nasa zawk thlen theitu a ni a, ram dang ten America rama an thil thawn luh te hmanga sang taka hlawkna an tel avanga an dinhmun siam thatnaah hian America lam chuan man to tak taka an lo leia sum an sen ralna chu President Trump chuan nasa taka ngaimawhin an ramin hlawkna a tel nasat zawkna tur leh ramdang te than duanna ti nep thei turin Tariffs War a rawn chawk chhuak ta rup mai a ni.

In sumdawn tawnna a US a ramdang thil thawnluh te chu Tariffs sang zawk a lakah Trump chuan ram dang te a han vau chho ta chher chher mai a, ram thenkhat te phei chu 500% tariff lakah vauin America ram ropuina leh hausakna chu hmanruaah hmangin a thian tha ram te an ni emaw, nilo emaw pawh sawi lovin indopui a kalpui a, ramdang te hi he in sumdawn tawnnaah hian tang khawng tlat turin chakna an nei lova, an tlawm ta duai duai a, America pawm theih tur an thil thawn luh ah te chuan inremna an siam chho ta mek zel a ni.

America el pha ber ram China laka he indopui President Trumpa’n a han puang tak tak chu China pawh a tlawm zawkah a tang zul zul a nih awm kha. US thian tha leh a thawhpui ram Europe ram te pawh Trump hian a dim chuang lova, Japan, S.Korea, India an ni emaw, ram hrang hrang te chu he indopuiah hian an tlawm mai nilovin Dawl zawrin US lakah hian an zawr a ni ber a, US pawm theih turin an in hnuk hniam ta zel a, he Trade Deal ah hian US chuan hnehna a chang chiang hle a ni. Ralthuam chelekna tel miah lovin President Trump chuan “Make America Great Again” tih chu a rawn champion pui ta mek a, US dinhmun chu a rawn sawh ngheh belhin hlawkna nasa tak a rawn tel chho ta mek a ni.

UKRAINE WAR TIH TAWP NAN TARIFFS WAR BAWK :-
President Trump chuan Russia – Ukraine War ah remna zawnga indo tihtawp thuah awka alo nei tawh a, mahse a hmalakna leh a in tiamna chuan awmzia a neih loh avangin amah sawiselna pawh a nasa hle a, tunah chuan he a hmalakna hi na zawka kal puiin ruahmanna thar a duang leh ta.

President Trump chuan Russia chu Ukraine war titawp turin a ti a, Putina a ngeina pawh a san takzet thu Trump chuan sawiin, Russia President Putin chu Phone hmanga dawrin he indona titawp tur hian a nawr a, mahse hei hian rah duhawm a chhuah lo. Hemi avang hian Ukraine laka a rilru chu Trump hian ti danglam thar lehin an ram venhimna atan ralthuam pek zui leh an nih tur thu a puang a nih kha.

Thawhtanni liam ta khan NATO Secretary General Mark Rutte nen Oval Office, White House a inkawmna an neih hnuah President Trump chuan Russia vauna a puang chhuak a, President Putin chu ni 50 chhung ngeia Ukraine war titawpa remna kawng siam tura hriattirin, hei hi tihhlawhtlin anih loh chuan Russia lakah 100% Tariffs kalpui anih tur thu a sawi a ni. NATO Secy. General nena an in biaknaah hian Ukraine chungchang bakah NATO leh US chungchang pawimawh te an sawi dun a ni.

Kum 3 chuang Russia – Ukraine War hi a kal tawh a, ram pahnih aiawh te pawhin inbiakna dawhkan lo kil tawh mahse rah tha a chhuah zui thei lo. Hemi avanga Ukraine leh US inkar boruak tha lo bakah US tanpuina tih tawp te chu Russia laka US hmalakna hian rah tha a chhuah loh avangin Trump chuan Ukraine venhimna tur ralthuam pek leh turin thu a titlu leh a, tin, NATO chhungkua atanga US inhlih mekna pawh dawh zawm leh mek niin an inkar boruak pawh thawhhona kawngah siam thar leh mek a ni bawk.

President Trump leh President Putin te hi in thian tha tak nia sawi thin an ni a, mahse tun boruakah hian an inkar hi a chhe tharleh mek a, Putin hian Trump vauna hi ngawhngawl a chhuah khum anih chuan Russia hian natakin a tuar thei dawn a, tuna Russia Stock Exchange thanna 2.7% ni mek chuan natakin a tuar thei dawn niin alang. Russia hian US vauna hi engtin nge a bawhzui dawn le.??

RUSSIA OIL LEITUTE LAKAH TARIFFS 500%:-
President Trump leh Putin inkar boruak chhe mekah hian Russia oil letu ram thlengin Tariff 500% kalpuiah Trump hian vauna a siam mek bawk a, Russia oil an lei titawp turin a vau a ni.

Russia oil leitu ram zingah hian China leh India te chu a lei hnem ram zual te an ni a, Russia ram sum leh pai dinhmun siam thatuah heng an oil leitu ram te hi dinhmun pawimawh tak luahtu an nih avang hian Russia – Ukraine war tih tawp anih theihna tura US hmalakna hi a khawng chho hle niin alang.

INDIA ENGTIN ZEL NGE NI DAWN ?
A chunga kan tarlan angin India chu Russia oil leitu ram lian a ni mek a, May thla liamta a Russia oil a chawkluh ah chuan nitin oil barrel 1.9m zet Russia atanga lei nia chhut a ni. India hian ram dang atangin oil hi 85% a chaw lut a, ama thar chhuah hi a khawp kham lo hle a ni. Hetia Russia oil leisaktute hian a man tlawm zawka an lei avang hian Russia hi an dawr a ni a, hmun danga barrela an lei aia tlawm zawka an chawkluh avangin an ni tan hian a hlawk hle a ni.
500% Tariffs kalpui tura US vauna siam hi India hian eng angin nge a dawnsawn dawn thu thar lam ala nei chiah lo niin a hriat a, Russia oil lei chu chhunzawm zel anih tur thu alo sawi tawh kha a ni a, tuna he vauna siam anih hnu hian India hi a dinna ngaiah a ding zel dawn nge, ruahmanna thar a siam dawn tih chu hunin ala rawn hril turah dah phawt mai ang.

TLANGKAWMNA :-
President Trump hian America ram ropuina leh hausakna belhchhah zelna turin hma chak takin ala a, hun kalta lamah khan America hausakna chu pawn lamah nasa taka luan chhuah tir anih avangin ram tam takin hlawkna leh dinhmun thatna atan an lo tel phah a, US el let theidawn dawn a ram then khat an thanna leh hmasawnna chu Trump hian chiang taka hmuin an luan chhuahna, an in senso ralna sum leh pai te chu titawpin a in hlip zel a, ram dang te lakah America ropuina, chakna leh hausakna chu alo san zual theihna turin Policy ropui tak, “Make Ameria Great Again” rawn kal puiin, hemi hmang ngei hian an ram chu a rawn sawh ngheh tir mek a, hetah hian ralthuam chelekna tel miah lovin Indopui rawn chawh chhuah chuan America ram chu hausak zualna, chak leh zualna, thil tih theih leh zualnaah rawn hung chho thar lehin ” America First” chu hlawh tling takin a rawn kal ta mup mup a, hemi avang hian a tuar tur ram ten an tawrh phah a, America thuhnuaiah Khawvel chu a rawn kun thar chho leh ta mek a ni.

He American President putar pui rauh hi a ram tan chuan a tha takzet niin alang a, America ropuina leh chakna, a hausakna hi hmanruaah thiam taka rawn hmangin ram ropui ber leh hausa a nihna hi ramdang te tana el phak rualloha siam tura hmanrua chu a rawn hlawhtlin pui dawn ta niin alang a, nakinah chuan he President putar Trump hi Chawimawina NOPUI American ten an la dawm tir ngei te pawh a rinawm a ni