Saitualah khuarel chhiatna thleng thulha hman tur bungrua sem chhuak

#ZONEWS July 15, 2025: Vawiin khan DC Conference room, Saitualah, District Disaster Management Authority (DDMA) hmalaknain khuarel chhiatna thleng thulha hman tur bungrua (search and rescue equipment) sem chhuahna hun hman a ni a, DDMA aiawhin Pu Lallawmawma, Addl. DC chuan bungruate a hlan.

Heng bungruate hi semchhuah an ni: Saitual Sub-Headquarters YMA hnenah stretcher-3, rescue helmet-7, megaphone-2, head torch-5, first aid kit-5, Tuiphal Group YMA hnenah rope 20 mm 50 mtrs-2, head torch-2, BDO Ngopa hnenah siren (portable, hand crank)-2, BDO Phullen hnenah siren (portable, hand crank)-1.

Vawiin hun hmannaah hian Pu K. Lalthangvunga, Vice President, Sub-Hqrs YMA chuan thu sawiin, khuarel chhiatna thleng thulha chetlakna tur bungraw tangkai tak tak an dawng thei chu lawmawm a tih thu a sawi a, mipuite pawhin awmze nei zawkin hma an lak phah thei dawn a ni, a ti. Pu K. Lalthangvunga chuan Mizoram chu tlang ram a nih angin kham kara chesualte pawh chhoh nan hruihrual tha tak te, lirthei chesuala hliam tuarte chhanchhuahna tur stretcher te leh hliam tuarte buaipui nan damdawi ‘first aid’ te an mamawh thin tih a sawi a, heng an thil mamawh te chu DDMA-in ngaih pawimawh sak a, an dawn theih nana hma an lakpui avangin lawmthu a sawi bawk a ni.

Vawiin inkhawm hi Pu Lallawmawma, Addl. DC chuan a kai hruai a, Pu Lalthakima Chhangte, SDO (S), Pi F. Zodingpuii, DIPRO bakah hian Sub-Headquarters YMA, Tuiphal Group YMA, BDO Ngopa leh BDO Phullen aiawhte an tel a ni.