RTI zawhna Chhanna atanga a lan danin Hmunphiah leh Sawhthing Sawrkarin a lei tlem hle!!

#ZONEWS July 16, 2025: RTI zawhna chhanna atanga a landanin Hmunphiah leh Sawhthing te Mizoram sawrkarin a lei tam lo hle a. Chhannaa a lan dan ang hi chuan Loneitute thar chhuah ang chhun te a lei zo lo nasa hle niin a lang.

July 11, 2025 thleng khan, Secondary Collection center hrang hrang atangin 2,95,894 quintals a lei a. Tin, Hmuhphiah hi ZOHANDCO kal tlangin 2,498 quintals (@Rs 80/kg) a lei bawk. ZOHANDCO kal tlanga sawrkarin sum a sen zat hi Rs 1,99,89,000 a ni.

Kan hriat angin kum 2025 May thla ral hmaa Sawhthing hi lei zo vek turin CM ngeiin a sawiin, a intiam a ni tih kan hria a. Chutianga intiam chung si chuan 30% pawh tlinglo an lei chauh a ni tih RTI chhanna atangin a rawn lang chhuak a ni. Hmunphiah phei chu an lei tlem hle a, khaw tam takah phei chuan an empenelled firm ten an lei lo hrim hrim a ni.

Sawrkar hi mipuite ta leh siam a nih ang leh, mipuite hamthatna tura thawk tur a nih angin, kan ram hmasawnna dik thlen theitu Loneitute ngaihsak leh duat hi a tih ngei ngei tur a ni a. Loneitu sawrkar laka beidawng tam tak an awm ni a sawi thawm te hi a tha lo hle. Chuvangin sawrkar hian Loneitute tan la leh zualin, Loneitute thlai thar, a bikin ram danga kan thawn chhuah theih, sawhthing leh hmunphiah phei hi chu a hun takah lei zawh sak thin se. An tihtawh atanga inzirin a hun takah hma la thei se tih hi mipuite beiseina a ni.