Mizorama Territorial Army din tura hmalakna kal zelah tun thla July thla atanga Territorial Army a tang tur te lakluh tura ruahman chu chhan hrang hrang vangin kumin November thlaah sawn a ni.

#ZONEWS July 15, 2025: Coordination & Land Search Committee, Chairman, Lt. Col. Clement Lalhmingthanga, MLA chuan ruahman lawk ang chuan Territorial Army a tang tur lakluhna hi June ni 14 atanga tan tur ni mah se, ruahsur nasa leh harsatna dangte avangin July thlaah sawn a ni a, hei pawh hi khawchhia leh thil dang vangte in November thla khian sawn leh a ni a ti.

Tun dinhmunah Lunglei leh Aizawl-ah Indian Army officer pakhat ve ve kaihhruaina hnuaiah company pahnih an in bun tawh a, Aizawl a mi chu Assam Rifles hmun hluiah an awm lailawk mek a, hetihlai hian Bungbangla Tourist Lodge building-ah an awm lailawkna tur ruahman sak an ni tih sawiin, PWD leh PHE tiamin Mizoram sorkar department hrang hrang te chu a tul anga thawm tha turin Coordination & Land Search Committee chuan an hriattir tawh a, an tihfel hunah an insawn thla ang a ti a, Lunglei lama mite pawh Assam Rifles hmunah an awm mek tih a sawi a ni.

Lt. Col. Clement-a chuan Territorial Army a tang turte chu ruahman ang chuan November thlaah pilot project angin Mizo hlang 70 lak phawt an ni ang a, a lehpekah a leta tam an la leh dawn a ti a, TA a tang turte lakluh ni tur chiang taka ruat a nih veleh form lakchhuah hun leh thu pawimawh te advertisement a tihchhuah a ni chauh dawn tih a sawi a ni.

Pu Clement Lalhmingthanga sawi danin, Mizo Territorial Army awmna tur hian thutlukna siam a la ni lova, kumin chhung chuan thutlukna siam hman an tum a ni. Mizorama Territorial Army bul tan nan hian Company pahnih a awm dawn a, company pakhat-ah officer pakhat leh Junior Commissioned Officer, JCO pali, bakah Other range-92, an vaiin mi 102 an awm dawn a, officer dil hun chhung chu June thla khan a tawp tawh a, Mizo tan bik ni lovin ram pum huapa dil theih a ni a, officer 19, hmeichhe pakhat leh mipa 18 lak an ni dawn a ni.