ICT LEH COOPERATION DEPARTMENT SECRETARY PU AMIT SHARMA IN LAWNGTLAI TLAWH

#ZONEWS July 16, 2025: Vawiin khan Pu Amit Sharma, IAS, Secretary, Information & Communication Technology leh Cooperation Department, Government of Mizoram, chuan Lawngtlai tlawhin sawrkar department- hotute nen DC Conference Hall- ah thutkhawm an nei a. Pu Cheemala Siva Gopal Reddy, IAS, Lawngtlai bawrhsap chuan thutkhawm hi a kaihruai.

Pu Amit Sharma chuan Lawngtlai district dinhmun hrechiang tur leh hmasawnna tur kawng hrang hrang awmte zirchiang tura lokal a nih thu a sawi a. Sawrkar department hrang hrangten tha leh chak zawka hna an thawh theihna turin ICT department chuan theih tawp a chhuah thin a ni, a ti. Pu Amit Sharma chuan E- Office bikah chuan Mizoram Secretariat – ah kalpui a nih tawh thu tarlangin, district – ah pawh kalpui thuai a beiseiawm tih a sawi . Digital Online Platform pawimawhna tarlangin, ICT Secretary chuan mipuiten awlsam zawka sawrkar an dawr theihna tur a nih angin, theihtawp chhuah mek zel a ni, a ti. Lawngtlaia Cooperative Society hrang hrangte hmasawnna turin chak zawka Mizoram sawrkarin hma a lak reng thu a sawi a. Pu Amit Sharma chuan sawrkar department hrang hrangte chu thawkho tura chahin, Lawngtlai mipuite tana theihtawp chhuah zel turin a sawm nghal bawk.

Pu Cheemala Siva Gopal Reddy, Lawngtlai bawrhsap chuan Lawngtlai District ngaipawimawha a hmun ngeia lo tlawhtu Pu Amit Sharma leh amah tawiawmtu ICT leh Cooperation Department hotute chungah lawmthu a sawi a. Lawngtlai District dinhmun leh sawrkar hmalakna hrang hrangte tarlanna a nei nghal a ni.

Thutkhawmah hian department hotuten an department hnathawh leh hmalakna tlangpui bakah harsatna an neih hrang hrangte Pu Amit Sharma hnenah hian an thlen a. Pu Amit Sharma chuan department hrang hrangte hnathawh fakawm a tih thu tarlangin, harsatna an neih ang angah puih a inhuam thu tarlangin, a changtu Minister – te hnena a thlen tur thu a sawi bawk.

Vawiin thutkhawmah hian Superintendent of Police (SP), Addl. Deputy Commissioner, Sub- Deputy Commissioner (SDC), District AH & Vety Officer, District Horticulture Officer, District Agriculture Officer, Distrcit Child Protection Officer, Principal, DIET, District Information & Public Relations Officer, DPO ( WCD), LADC, CADC leh BSNL aiawhte an tel thei a. Pu Cheemala Siva Gopal Redyy, Lawngtlai bawrhsap chuan lawmthu sawina neiin hun a khar.