Lungleiah ‘National Training Programme for BLO’ buatsaih a ni

#ZONEWS July 16, 2025: Vawiin khan Lunglei District chhunga assembly constituency panga – Lunglei North, Lunglei East, Lunglei West, Lunglei South leh Thorang huam chhunga Booth Level Officer (BLO)-te tan inthlanna hming bu (electoral roll) endik runpui (special intensive revision) lo awm tur atana inpuahchahna training buatsaih a ni.

He training hi Election Commission of India (ECI)-in July ni 2–17, 2025 chhunga ‘National Training Programme for Booth Level Officers’ buatsaih tur a tih anga buatsaih niin, vawiin khan Lunglei khaw chhung hmun thumah leh Lungsen leh Bunghmunah te BLO training hi buatsaih a ni a. West Tuipui bial chhunga BLO-te tan chuan naktuk khian Tlabungah training hi buatsaih a ni thung ang.

Training-ah hian State Level Master Trainer (SLMT)-te – Lunglei Election Officer Pi Lalhruaitluangi, Lunglei DCSO Pu Lalremruata Sailo, Lunglei DLAO Pu Beitlotha Nohro, Lungsen BDO Pu Lalhruailiana Zote, Bunghmun BDO Dr Lalramdintluanga leh Tlabung SDO (Civil) Pu Moses Lalfakawma Tlau te’n BLO kal khawmte chu thil pawimawh hrang hrang an zirtir a. India Danpui leh dan hrang hrangin a sawi anga inthlanna dik leh felfai a awm theih nana BLO-te mawhphurhna te, hna thawh nana BLO App ṭangkai zawka hman dan leh electoral roll buatsaih kawnga tihsual a awm loh nana fimkhurna tur te zir ho a ni a. Special intensive revision atana hriat tur pawimawh hrang hrangte zir ho ni bawkin, thil zirte chu a taka tih chhin nghal a ni bawk.

Tun dinhmunah Lunglei District-ah BLO 186 an awm mek a. Assembly bial tina BLO awm zat chu heti ang hi a ni:

30-Lunglei North: 28
31-Lunglei East: 23
32-Lunglei West: 23
33-Lunglei South: 40
34-Thorang: 37
35-West Tuipui: 35