Mizoram State Policy Coordination Committee (MSPCC) thukhawm

#ZONEWS July 17, 2025: Mizoram State Policy Coordination Committee (MSPCC) chu nimin khan an Vice Chairman Pu KC Lalmalsawmzauva kaihhruaiin P&PI Department Meeting Hall-ah thukhawm in Bana Kaih Scheme hnuaia thu rel tur pawimawh hrang hrang an sawiho.

Nimin meeting-ah hian Bana Kaih Scheme loan component hnuaia PMEGP loan application bawhzui chungchangte sawiho a ni a. Ranvulh trade bikah Livestock Insurance ti thei insurance company thawhpui chungchang sawiho ni bawkin, AH & Vety department in an bawhzui tura rel a ni a. CM Special Package chungchang sawi ni bawkin, Aizawl khawpui chhunga ran vulh dilna lo lut te chu khawtlang hruaitute phalna tel lo chuan pek a theihloh avanga dilna lo lut te ennawn a ni a. Commerce and Industries department hnuaia loan component atana dilna te enho a thliar a ni bawk.

Vawiin meeting ah hian loan component hnuaiah Commerce & Industries kaltlanga dilna lut zingah 33 chu pawm (approve) belh a ni.

Meeting-ah hian MSPCC memberte bakah C&I Department, AH& Veterinary Department, ICT leh I&PR aiawhte, KVIC, KVIB, SLBC leh Partner Bank atangin aiawhte an tel a ni.