#ZONEWS: INDIAN SUPER LEAGUE (ISL) A AWM ZEL DAWN EM?

#ZONEWS #ARTICLE July 13, 2025: All India Football Federation (AIFF) lam thu chhuah leh an sangawizawnpui Football Sports Development Limited (FSDL) thu chhuah atanga a landanin, Indian Super League (ISL) hmalam dinhmun a chiang ta lova, ISL hi a awm zel dawn em tih pawh hriat a ni ta lo. Hei hian India ram football dinhmun chiri zia a tarlang chiang viau mai.

1. AIFF leh FSDL Inremna tawp dawn?

AIFF leh ISL atana an thawhpui FSDL te inremna hi December 8, 2025 hian a tawp tawh dawn a. AIFF leh FSDL te hian thawhho leh dan tur kawng zawng mahse an thu a inhmu hlei thei lova. AIFF thu chhuah chuan, Season lo awm tur 2025/26-ah an thawhpui FSDL ten ISL an chhunzawm thei tawh dawn lo tih an sawi thu an tarlang a. AIFF thu chhuah sawi danin, November 21, 2024 khan FSDL nena an thawhhona tithar (renew) turin rawtna hmasa ber chu an thehlut a. February 5, 2025 khan hemi chungchang hi AIFF thuneitute leh FSDL lamten New Delhi-ah sawihoa, hemi hnu, March 5, 2025 khan Mumbai-ah an sawiho leh a ni.

March 5, 2025 khan FSDL lamin an rawtnate an thehlut a, chumi doletna chu AIFF chuan April 21, 2025 khan an siam ve leh bawk a ni.

Hemi hnu hian Supreme Court thlengin an thu leh hla hi a kala, April 26, 2025 khan Supreme court chuan thu leh awm hma chu an inremna (Master Rights Agreement) chu tithar (renew) hrih lo turin a ti ta a ni.

Supreme Court-in sawiho tura a tih angin, AIFF leh FSDL te hian han sawiho leh ngial mahsela an inrem thei ta rih lo a ni.

AIFF lam hian ISL chu tawp lova a kal zel dan tur theihtawp chhuahin an ngaihtuah dawn tih sawi mahsela, an thawhpuite berin kut an sil san si chuan a khaihlak ngei dawn niin a lang ta?

2. ⁠FSDL ten Agreement an chhunzawm duh tawh lo.

FSDL ten ISL club hrang hrangte hnena ISL dinhmun mek an hrilh hriatnaah, AIFF nen an inremna (Master Right Agreement (MRA)) chu December 8, 2025 hian a tawp dawn a, chutihlaiin ISL season chu September – April a ni bawk si a, Season lo awm tur pumpui atangin hmun thum a thena hmun khat (one-third) chauh an inremna hian a awh tawh dawn a. FSDL leh AIFF ten an inremna hi tihthar leh tumin inbe mahsela, December hnu lam atana inremna mumal a awm theih tak loh avangin, FSDL chuan ISL 2025-26 chu an kalpui zui theih loh tur thu an sawi a ni.

3. ⁠AIFF in sum a neilo; chhungkaw buaina a nasa tual tual.

AIFF hian han sawi ve viau mahsela, tun dinhmunah ISL chhunzawmna turin sum a nei lova, sum hnar a nei bawk lova; chumai ni lovin, AIFF chhungkuaah inpuhtawnna leh insawi neuh neuhna social media lamah kan hmu ta fo bawk. Hetiang a nih avang hian sum lama an buaina hi chinfel mai theih niin a lang lova, India ram football inelna sang ber kan neih mek, ISL hian a tuar ngei dawn niin a lang ta.

4. ⁠Supreme Court a inrawlh bawk si.

A hma lama kan sawi tawh angin, AIFF leh FSDL te thu a inhmuh theih tak loh avangin Supreme court hial a inrawlh ta a. AIFF leh FSDL inremna chungchang pawh Supreme court thu lo ngaichang hrih turin a ti ta bawk si a. Supreme Court hial a inrawlh tak avangin chuti mai chuan thil a fel mai dawnin a lang ta lo?

5. ⁠AIFF a hlawhchham?

ISL chu sawi loh, I-League dinhmun kan hria a, buaina hrang hrang a awm neuh neuh a, club leh club inkhing thawm a awm reng a, Season zawh hnu daihah pawh Champion chiang lo tihte, tun thlengin relegation tur pawh la inthlak thei dinhmunah club thenkhat-te an la ding a. Season thar a tana an inbuatsaih sup sup tawh laiin AIFF lam an la che buai em em reng thung.

ISL lamah buaina tihian a’n awm chho leh a, India Coach thinte ngei pawhin ISL hian India football a chawikan em em loh thu an sawi a. Kawng hrang hrangin Field chhung leh pawnah AIFF an hlawhchham a ni deuh ber mai.

6. ⁠Indian Football ranking a hniam zual.

Kan thenawm ram, kan hnuaia awm nia kan ngaihte nen kan intum tawk em em reng mai a. Chumai a ni lo, kan thenawm ram Bangladesh thlengin football-ah an than laiin, keini a hnung tawlh zawngin kan kal thung. Hmanni lawka Footballa kan tlukpui ram ni thin, Uzbekistan ten FIFA World Cup 2026 an khelh tawh dawn laiin, India erawh hmanni lawk a 102-naa awm kha 133-naah kan tawlh ta dawrh mai. Mi ramin hma an sawna keini erawh kan hnung tawlh thung.

7. ⁠Indian football hmabak a thim hle.

AIFF hian hmalam hun atana ruahmanna tha a nei lova, tum mumal a nei lo te pawh kan tithei awm e. Hmasawn zawnga kal aiin, A chhungah thuneihna inchuhna a  nasa niin a lang a. Kan league sang ber meuh pawh hmabak nei lovin a awm ta thut a nih hi. Kan league te lah chu kum tin maiin team awmzat thlengin a dang lam reng a, bul thut mumal a nei lova. Midang tan pawh thawhpui an chakawm loh. FIFA lamin theihtawp rawn chhuah thin mahsela, a dawhthleng lam a inpeih miau lova, hmasawnna tak tak an thlen thei lo chu a ni deuh ber mai. Tun dinhmunah India football hian hmabak mumal a nei lova, a hmabak a thim hle.

8. ⁠Mizo thalaite a tuar nasaah an tang thei?

Kan hriat angin Mizo thalaite Mizoram pawnah inkhel an tam tawh hle a, ISL lamah pawh kum tin an pung tual tual a, Ei zawn nan leh Chhungkaw chawm nana hmang an tam ta hle mai. ISL mai ni lovin, I-League Club leh State hrang hranga club dang dangah kan Mizo tlangvalte an khel chhuak nasa a. Thalai tam takin an tuina Football hmangin ei an zawng mek a ni. India ram football hmalam hun a chian loh takah leh ISL thleng pawha dinhmun chiang lo taka a din tak avangin, Football khel nasa Mizo thalaite hi India ramah chuan a tuar nasa ber tur an nih loh pawhin, a tuar nasa ber zing a mi an ni ngei ang le?!

#zonews #AIFF #FSDL #ISL #Football