Champhai Leilet zawlah buh phun runpui zovin loneitu tam zawkin buh an phun zo tawh

#ZONEWS July 17, 2025: Mizorama leilet zau ber Champhai Leilet zawlah buh phun runpui zovin loneitu tam zawkin buh an phun zo tawh a, kumin ah May leh June thla chhung khan buhphun tur Buhchi an dah a, hetihlai hian tui harsatna avangin Buhchi dah hun pangngai a dah theilo tamtak an awm bawk.

Champhaia kan corr sawi danin, tunah hian Buh hi a tamzawkin an phun tawh a, tuilianin Champhai zawl zau tak a chim avangin loneitu thenkhat chuan buh hi a hun takah an phun thei lo a ni.

Champhai Leilet zawlah hian Phai nei thenkhatte chuan tui harsat avangin Leihnuai tui pump chhuakin Buh hi an phun bawk a, kum dang aiin hlawhfa man, Buhphun leh Buhchi pawh man pawh sang zawkin Buhphun in cheng 600 an hlawh thin a, Buhchi pawtin cheng 800 atang 1200 an hlawh thin bawk a ni.

Hetihlai hian Hnahlan kiang, Tiau lui kama Laili phai ah pawh mi tam zawkin buh an phun tawh a, Tiau lui kam tho, Ngur khaw rama Zilhri phaiah chuan loneitu tam zawkin buhchi a la tet deuh avangin buh an la phun thei lova, Zokhawthar bul leh Bulfekzawl leilet ah chuan loneitu tam zawkin buh hi an phun zo tawh a, Vaphai bul, Saikhumphaiah erawh, boruak tha lo tun hnaiah a thlen thin avang leh an tuilakna, tuikawng a chhiat avangin loneituten an duh angin hma an la chak thei lo a, mi tam zawkin buh an la phun thei lo ni.