Champhaiah MLA Er. H. Ginzalala hovin bank hnathawh thlirlet turin thukhawm

#ZONEWS July 18, 2025: Vawiin khan DC Conference Hall, Keifangtlangah bank hrang hrang tana quarter tawp enletna District Consultative Committee, District Level Review Committee leh District Level Security Committee an thukhawm a, Champhai North bialtu MLA Er. H. Ginzalala’n khuallian niin a hmanpui a, Bawrhsap Pu Mohammad Aaquib chairman niin hun a kaihruai.

MLA Er. H. Ginzalala chuan credit-deposit (CD) ratio tam tawk lo a ngaimawh thu leh hmun thenkhata bank branch thar hawn a tul thu a sawi a, mipuiin bank hnathawh hrang hrang an hriata an hman tangkai a ngai tih a sawi. Tourism atana hmalakna leh hmathlir sawiin Champhai District hi khualzin kal tamnaa siam an tum thu a sawi a, hmun hrang hrangah project tinzawn an nei tih a sawi bawk. Bawng vulh an tlem tawh thu sawiin bawng chaw mamawhna Champhaiah leh district dangah mamawhna a sang dawn a, bawng chaw tha chi thar theih dan leh district danga hralh theih dan zawng turin a chah. Bank manager te an harsatna hrang hrang sut kian dan tur ngaihtuaha sawiho turin a chah a, an thlentum (target) neih te an thlen ngei nan theihtawp chhuah turin a fuih bawk a ni. Heng hmalakna leh hmachhawp hrang hrang atan hian thiamna leh changkanna thang zel hman tangkai a tul thu a sawi bawk. MLA chuan Annual Credit Plan 2025-26 a tlangzarh nghal bawk a ni.

He meeting-ah hian bank hrang hrang invenhimna atana ruahmanna an neih chungchang te, pawisa thar (fresh currency) a tlem vanga buaina awm te, PM Vishwakarma te, PMEGP te leh scheme dang hrang hranga hmalak zel dan tur te, zau zawka mipui a thlen dan tur leh mipuiin hamthatna tam thei ang bera an dawn theih dan te sawiho a ni. Hmun hrang hranga bank branch te deposit zat te, advance zat te, CD ratio te leh loan hrang hrang an pek zat te thlir ho niin aia sang thleng thei tura hmalakna – saturation camp neih dan tur te sawiho a ni bawk. Chairman Pu Mohammad Aaquib chuan MLA-in a telpui theih avang leh thu tha tak tak a sawi avangin lawmthu a sawi a, Champhai tana hmathlir a sawi hrang hrang te tha taka bawhzui ngei an tum thu a sawi bawk.

He meeting-ah hian bank hrang hrang branch manager te, line department hotu te, RBI leh NABARD hotu te leh VC te an tel a ni.