ZIRTIRTU SAWN KUAL DAN TUR TRANSFER & POSTING RULES CHUNGCHANGAH INRAWN KHAWM A NI

#ZONEWS July 18, 2025: Vawiin khan Mizoram Education Reforms Committee buatsaihin The Mizoram Education (Transfer & Posting of School Teachers) Rules 2025 chungchangah School Education Directorate Conference Hall-ah inrawn khawmna neih a ni a, School Education Minister Dr Vanlalthlana’n hun a hmanpui.

School Education Minister Dr Vanlalthlana chuan he hunah hian thusawiin zirtirtu transfer hi a hautak a, dilna thahnem tak a lut reng a, teacher ten harsatna chi hrang hrang an nei a, nu leh pa enkawltu an nih avanga transfer dil te, politics thila transfer nawrna te, chhungte dam lohna avanga dilte leh chhan tha tak tak neite an ni a, dilna chinfel hi hna hautak a nih thu a sawi. Minister chuan zirtirtu tam tak mahni post-ah an awm lova, Primary School ah te hian zaa 45 hi mahni post a awm lo an ni a ti.

Minister chuan tun dinhmunah thingtlang atanga Aizawla sawn luh an tamna chhan chu zirtirtu senior te hi Aizawlah post an tam a, an pension zel a, an aiawh post ruak hnawh khat turin thingtlanga mi sawn luh zel an ngai a, Aizawla lut an tam lo thei lo a ni a ti.

Minister chuan Transfer & Posting Rules chu Mizoram Education Reforms Committee-in vawi tam tak an thlirho a, khawtin khawih leh thawktu ngah ber Department a nih bawk si avangin inrawn khawmna buatsaih a ni a ti a. Transfer & Posting Rules hman theih leh hman ngam siam chhuah a ngai a ni a ti.

School Education Director Pi Angela Zothanpuii pawhin thusawiin School Academic Session, School timing leh School Uniform chungchangah te inrawnkhawmna neih a lo nih tawh thu sawiin vawiina sawiho transfer chungchang chu School Education Department-ah hna hautak tak leh lian, in leng pawh an tamna chhan ber a nih thu a sawi.

Dr Rohmingmawii Member Mizoram Education Reforms Committee (MERC) chuan kum 2020 khan Gazzette meuh chhuahin rules hi duan a lo ni tawh a, state thenkhatte rules enin a hman ve theih te enin siam a nih dan te, MERC in vawi engemawzat a thlirho tawh thu a sawi a. Online portal hman a nih dawn thu te, transfer theih hun chhunga transfer window a awm dawn thu te, inrawnkhawmna leh rawtna dawn atangin siamthat ngai lai te siamthat a nih dawn thu a sawi.

He public consultation meeting Pu David Lalthantluanga Special Secretary kaihhruaiah hian School Education Department a officer te, Service Association hrang hrang hruaitute, mimala rawtna neite an kalkhawm a, siamthat an duh laite an sawi hlawm a ni.