Serchhipah thawnthu inziahsiak lawmman sem a ni; thawnthu insawisiak buatsaih a ni leh dawn.

#ZONEWS July 23, 2025: Mizoram Tourism leh Art & Culture Department tangkawp buatsaih khualzinte hipna tur Storytelling Competition a Serchhip District aiawh tur thlanna neih chhoh mek a ni a. A thawhkhatna atan Serchhip Sub Headquarters YMA thlazar hnuaiah Branch hrang hrangte inelna Thawnthu Inziahsiak buatsaih niin vawiin khan Serchhip DC Pu Paul L Khuma chuan Serchhip DC Meeting Hall a programme buatsaihah a titha thlan chhuah mi 10 hnenah lawmman a hlan a ni.

“Tuichangral Lamah Aw” tih thuziaktu Pu C Sawidawla, East Lungdar Branch YMA chuan lawmman pakhatna a dawng a. Lawmman pahnihna “Tuichangral Lo Kai La” tih ziaktu Pu R Lalfakawma, Rahsi Veng Branch YMA, North Vanlaiphai chuan lawmman pahnihna a dawng a. Lawmman pathumna dawngtu Pi Lalsangzeli, Khawlailung Bunghmun Veng chuan “Lo Zin Ve Rawh” tih a ziak thung a ni. Hei bakah hian consolation prize mi pasarih hnenah sem a ni bawk.

August ni 8 a neih tur Mizoram pum huap Storytelling Competition-a Serchhip District aiawh tur hian a taka sawitu tur “narrator” mi pahnih thlan chhuah a ni leh dawn a. A thlanna hun hi August ni 5 ah Serchhip DC Pisapui Hall-ah neih a ni ang. He inelna hi Serchhip Sub Headquarters YMA President Pu Kawlthuama’n a kaihruai anga. Endiktu atan mi pathum – Pi Lalnunmawii, DIPRO; Pu K Lalrinchhana, Asst Professor, Govt.Serchhip College leh Pu Samuel Saithuamliana, Lecturer, Govt Serchhip Higher Secondary School te chu ruat an ni a. He mi ni ah hian thawnthu buatsaih sa pahnih duhthlan tur siamin mi 5 an inel dawn a ni.

He Thawnthu Insawisiak hi Serchhip District mipui a duh apiangin an en theih turin DIPRO Serchhip youtube channel-ah chhawpchhuah a ni ang.