Lunglei West bialtu MLA Pu T. Lalhlimpuia’n Lunglei Bazarvenga Agriculture Market Shed Cum Multi Utility Building sak thar a hawng

#ZONEWS Lunglei October 14, 2025 RKVY sum cheng nuai 99.482 senga sak, Lunglei Bazarvenga Market Shed Cum Multi Utility Building chu vawiin khan Lunglei West bialtu MLA Pu T. Lalhlimpuia’n a hawng.

Market Shed Cum Multi Utility Building hawnna inkhawmah hian khuallian, Lunglei West bialtu MLA Pu T. Lalhlimpuia chuan Market Shed hawn thar chu veng chhung leh Lunglei mipuite tana hmasawnna lawmawm tak a nih thu sawiin, harsatna hrang hrang kara sak puitlin leh hawn theih a ni ta chu lawmawm a tih thu a sawi a. Market Shed sak chu Bialtu MLA hmasa Pu C. Lalrinsanga bul tum a nih thu leh ani bul ṭan chu MLA a nih ve hnuah chhunzawm a, tihpuitlin a nih thu a sawi a. He Market Shed sak puitlin a nih theih nana bul ṭantute, department lam leh Bazarvenga tlawmngai pawl leh khawtlang hruaitute thawh honaah lawm thu sawiin, Market Shed chu ṭangkai taka hman a nih a beisei thu a sawi.

He huna khual zahawm, Agriculture & Farmers Welfare (A&FW) Department Director Pu R. Lalnunzira chuan Market Shed leh Multi Utility Building chu lo neitu leh huan thlai thar chhuaktute’n an thil thar chhuah awlsam leh thianghlim taka an zawrh chhuah theihna tur leh mipuite’n ei tur hrisel leh tharlam an hmuh theihna tura hmun pawimawh tak a nih tur thu a sawi a. A hmang turte’n uluk leh thianghlim taka hmang a, enkawl tur te, Market Shed-a zawrh tur thei leh thlai hrisel leh tharlam tak tak thar chhuak tura hma la zel tur te’n mipuite a chah.

Market Shed Cum Multi Utility Building hawnna inkhawm hi Lunglei District Agriculture Officer Pu VL Hmangaihchhunga’n a kaihruai a. Rev. K. Lalnunsanga’n hunserh hmangin, Bazarveng Branch YMA President H. Lalramdinliana’n inlawmna thu a sawi a. Lunglei Municipal Council (LMC) Chairman Pu Lalzuithanga leh Bazarveng Local Council Chairman Pu C. Biakthankima te pawhin thu sawiin, SDAE Pi Sangkungi chuan technical report a pe a. Assistant District Agriculture Officer Pu K. Lalrinfela’n lawm thu sawiin hun a khar.

Bazarveng Market Shed Cum Multi Utility Building hi Rashtriya Krishi Vikas Yojana (RKVY) sum cheng nuai 99.482 senga sak a ni a. Kum 2023 October thlaah hna thawh ṭan niin, kumin March ni 24 khan zawh fel a ni.

Vawiina hawn Market Shed Cum Multi Utility Building, Bazarveng hi square metre 321.61-a zau a ni a. Ground Floor-ah Market Shed awmin, First Floor-ah MUP Committee Room leh YMA Property Room a awm a. Second Floor chu lirthei dahna ‘garage’ niin, Third Floor-ah YMA Conference Hall a awm bawk.