Health Minister-in Mizoram Diabetics Society Annual General Meeting vawi 14-na a hmanpui

#ZONEWS Aizawl, July 24, 2025: Vawiin khan Health&Family Welfare Department changtu Minister Pi lalrinpuii chuan, I&PR Auditorium, Treasury Square, Aizawlah, Mizoram Diabetics Society Annual General Meeting vawi 14-na chu khuallian niin a hmanpui.

He hunah hian khuallian Health&Family Welfare Department changtu Minister Pi Lalrinpuii chuan thu sawiin, Zunthlum leh a kaihhnawih natna neite tana pawl mumal tak din a ni leh, chumi puala hun an hmang thei chu lawmawm a ti tak zet tih a sawi a. Mizote chu hnam ang pawha ei leh in ngaina tak mai bakah, nunphung uluk tawk loh avanga Zunthlum leh a kaihhnawih natna ten a tihbuai nasat tak hnam kan ni tih sawiin, chumi laka fihlim tur leh a vei tawhte pawhin hrisel taka nun an hman theihna tur chuan kan taksain a mamawh chin chauh ei leh in kan zirte,, insawizawi uarte chu thil pawimawh tak a nih thu a sawi a. Upa lam mai bakah, nunphung uluk tawk loh avanga kum naupang lam thleng pawha thau luatna (child obesity) thlengin thil hluar leh veiawm tak a lo nih chhoh tak dan te tar langin, fate nunphung leh an ei leh in thlengin nu leh pa te chuan mawhphurhna sang tak kan nei tih a tar lang a. Annual General Assembly chu hlawkpui ngei tum theuh tur leh nuam taka hmang turin kalkhawmte chu duhsakna a hlan nghal bawk a ni.

He hun pual hian chawhnu lamah kalkhawmte, a duh apiang tan Free Clinic neih nghal a ni a. Hei, bakah hian Zunthlum leh a kaihhnawih mahnia awlsam taka in-test-na tur hmanruate chu man tlawm zawkin kalkhawmte lei theih tur hian chhawp chhuah a ni bawk.

Vawiina hun hman hi MDS Vice President, Dr. Eric Zomawia chuan kaihruaiin, kalkhawmte lawmna thu a sawi a. MDS President Pu T. Saikunga hnen atangin thusawi ngaihthlak a ni a. MDS Joint, Secretary leh treasurer-te hnen atangin report ngaihthlak niin, mithiam bik rawih (resource-person), hnen atangin Zunthlum leh a kaihhnawih natna chungchanga hriattur pawimawh chi hrang hrangte zirhona bakah zawhna leh chhanna hunte hman a ni a. MDS Join Secretary Pu K.L. Liannghaka chuan lawmthu sawiin hun hi a khar a ni.