AIZAWL DISTRICT CHHUNGA CHIEF MINISTER’S SPECIAL PACKAGE DAWNGTU( PROGRESS PARTNERS) TE TAN ORIENTATION TRAINING BUATSAIH A NI.

#ZONEWS AIZAWL, July 24, 2025: Vawiin chawhma khan DC Office, Aizawl chuan Aizawl district chhunga Bana kaih( Hand Holding)  Scheme hnuaia peng pakhat CM’s Special Pakage dawngtute(progress partners) tan Dawrpui Multipurpose Hall-ah Orientation Training a buatsaih a. Pu Lalthansanga, Hon’ble Minister for Sericulture, Fisheries, EF&CC,LRS&W Department chuan khuallian niin programme a hmanpui  a, Progress Partners te hnenah Training certificate a sem nghal bawk.

Vawiin programme-ah hian  thu sawiin, Khuallian chuan CM’s Special Package dawngtu tur progress partners thlan kawngah Sawrkar a fimkhurin a duhtui hle a, kalphung thar, mipui sawrkarah hian hmasawnna tak a thlen theih nan duhsak bik awm lo, thlei bik awm lovin, mi rintlak, mi taima leh hlawhtling tura theihna neite chauh thlanchhuah a nih thu leh politics a inrawlh loh thu  sawiin, diltu  tha hnem tak zingah, Line department ten uluk taka an zirchian hnua, Bana kaih tlak leh chhawmdawl tlaka an ngaih te an thlang chhuak a. Chuvangin CM’s Special package dawngtute hi beneficiaries pawh kan ti ve lova, hmasawnna tura sawkar thawhpuitu (progress partners) kan ti a ni, tiin Progress partner te chu sawrkarin an chunga rinna a nghah ang ngeia, rinawm tak leh taima taka thawk tura fuihin, duhsakna a hlan a ni.

CM’s special package hi Bana Kaih (Hand Holding) scheme hnuaia peng pakhat niin, Aizawl district chhunga hian Department 11 hnuaiah progress partners  467 an awm mek a. Mizoram district zinga  Aizawl district chu Progress partners ngah ber a ni.

Vawiin Orientation Training Programme hi Pu Zoramsiama Hmar, Addl.DC chuan kaihruaiin, Pi PC. Zonuntluangi, Addl DC in keynote Address sawina hun a hmang a. Pu C.Lalnghakliana, Research Officer, P&PI Deparment  hnen atangin  CM’s Special Package chungchang leh a kaihhnawih thil hriattur pawimawh te ngaihthlak a ni bawk.

Pu Samuel Vanremruata, Programme Manager Mizoram Start-up Mission chuan “Introduction to Entreprenuership & Bussiness Management” tih thupuia hmangin Progress Partners te zirtirna a nei a. Pu Lalchawimawia Sailo, Manager SBI pawhin “Basic Book keeping” tih thupui hmangin  progress partner kalkhawm te zirtirna a pe bawk.