Saitualah District Level Narco Coordination Centre (NCORD) Committee an thu khawm

#ZONEWS Saitual July 24, 2025: Vawiin khan DC Conference Room, Saitualah, District Level Narco Coordination Centre (NCORD) Committee chu an chairman, District Bawrhsap ni bawk, Dr. Lalngura Tlau kaihhruainain an thu khawm.

He hunah hian District Bawrhsap Dr. Lalngura Tlau chuan thu sawiin, khawtlang hruaitute leh line department hotute chuan thahnemngai takin ruihhlo an do thin tih a sawi a, Saitual District-ah ngei pawh ruihhlo engemaw zat man a lo ni tawh a ni, a ti. Bawrhsap chuan ruihhlo dona kawngah damdawi hman sualna chu huat tur a nih laiin, a titu mihring erawh huat tel loh tur tih a sawi a, kalkhawmte chu ruihhlo do kawnga theih tawp chhuah a, hma la zel turin a fuih nghal a ni.

Vawiin thutkhawmah hian Pu Gaurav Tyagi, SP chuan ruihhlo do kawnga an hmalak tawhna hrang hrang te a tarlang a, NCORD meeting hnuhnung ber atang khan ruihhlo engemaw zat an man thu leh awareness programme vawi thum an neih tawh thu sawiin, zirlai naupang 500-600 vel an tel tih a tarlang bawk.

SP chuan kalkhawmte chu ruihhlo man kawnga pui thei tur thil hriat an neih chuan a hnena hriattir thin turin a chah a, an information dawn te hian kawng tam takah a pui thin a ni, a ti. Pu Gaurav Tyagi chuan VC te thu rawn angin hmun hrang hrangah checkpoint an dah tih a sawi a, motor veivak te chu a tul angin an endik thin a ni, tih a sawi bawk.

Vawiin thutkhawmah hi Dr. Lalngura Tlau, NCORD chairman & DC, Pu Gaurav Tyagi, SP bakah NCORD committee member te an tel a, 18th NCORD meeting-a thu relte thlir letna hun hman nghal a ni.