Contract hnaah Departmental work emaw, spot quotation emaw restricted tender emaw a awm reng rengin CM approval lak phawt turah la lo an awm thin – Chief Minister Pu Lalduhoma.

#ZONEWS July 25, 2025: Chief Minister Pu Lalduhoma chuan contract hna reng reng, departmental work emaw, spot quotation emaw restricted tender emaw a awm reng rengin Chief Minister approval lak phawt tur a nih thu leh, la lo an awm leh zeuh thin thu a sawi.

Nimina Aizawl Civil Hospital Trauma Care Facility thar a hawnnaah he thu hi sawiin Chief Minister chuan chutianga Chief Minister pawmpuina, approval lak loh chu a hnuah a hnawk ngei ngei dawn thu leh audit-ah a buai ngei ngei dawn thu a sawi a. Heta a tuartu tur chu official te an ni a ti a, hetih hunah hian Minister te chu an bo tawh dawn a, ziaka engmah a awm tak tak tawh dawn loh avangin official te chu an hnain a tuar lohna tur an ngaihtuah a ngaih thu leh an fimkhur a ngaih thu a sawi a ni.

Tunah chuan ram tana thahnemngai ten ro an rel tawh avangin project te tihhlawhtlin thuai thuai an duh tawh tih Chief Minister chuan a sawi a. Tunah pawh dashboard nen an inchhawp reng tawh thu leh eng department project pawh a hmehchhuah thei nghal vek thu a sawi a. Hetah hian khawtlai an awm leh awm loh te pawisa hman tawh zat bakah a hna thawh tawh chin te a hriat theih vek thu a sawi a. Project tih muan an phal tawh loh thu leh kum 5 chhungin tam tak thawh hman an tum thu a sawi a ni.