Aizawl-Silchawr kawngpui a chhelai hmun thenkhat thawm that mek a ni; Zoram Hnatlang koh tum thulh a ni.

#ZONEWS July 25, 2025: Kawngpui siamtha tura na taka nawrtu pawl Joint Civil Society of Mizoram (JCM) Secretary Dr. Vanlalsiama Chhangte chuan Kawnpui leh Sairang inkar kawng chhia chu siam tan a ni tih an hmu tih a sawi a, hemi avang hian Zoram Hnatlang koh an tum pawh an thulh tih a sawi.

Akashvani News in a kawmnaah Dr. Vanlalsiama Chhangte chuan an phut anga kawng thawm that hna chu thawh a nih thu leh Mizoram PWD leh NHIDCL pawhin hna an lo thawk tih an hmu a ti a, Kawng chu la chhe viau mahse hma la tuten theihtawp chhuahin kawng thawm that hna an thawk tih an hmuh thu a sawi a ni.

Nimina Kawnpui leh Sairang inkar kawngchhia an tlawh hnuah JCM te chuan thuchhuah siamin an thuchhuahah hian kum tin tun ang hun laia kawngpui kal hleihtheih loh a a awm ziah chu Sorkar inthlahdah vang leh remruatna fel awm loh vang nia an ngaih thu an sawi a. Kawngpui pawimawh tak, NH 306 & 06 – Mizoram ‘Life Line’ chu lirthei tlan theihna atana enkawl reng tur leh a siamthat hna pawh chak taka kalpui zel turin NHIDCL te an phut tlat tih an sawi a ni.

Joint Civil Society of Mizoram (JCM) chuan Mizoram hmun hrang hrang, a bikin NH 44A Darlak leh Tuidam inkar te, Mamit leh Bairabi inkarte, Mizoram chhim lam leh khawchhak lama kawngpui chhe tak takte pawh siamtha chhunzawm zel turin Mizoram Sorkar an ngen tih an sawi bawk a ni.

Nimin vek khan Mizorama lirthei pawl hrang hrang chuan thuchhuah intawm siamin chak lakluhna kawng chhe lutuk chu sawrkar leh NHIDCL in tun thla chhunga tlan nuam tawka siam turin an phut an ti a, kawng siam anih loh chuan an thiam dan anga hmalak an tum tih an sawi a ni.

Nimina Lirthei a eizawng pawl hrang hrang RD Conference Hall Aizawl-a thukhawm chuan National Highway No. 306 (Sairang to Kawnpui), National Highway No. 06 – (Sairang to Buichali), National Highway No. 108 (Sairang to Langkaih), National Highway No 6 (Kolasib to Bairabi) kawng chu lirthei tan zawh hlauhawm khawp a chhia ani an ti a, kawngpui tarlante chu NHIDCL leh Mizoram sorkar in July ni 30 thleng tlan nuam tawka siam an phut tih sawiin July ni 30 thlenga an harsatnate phuhru tura kawng hi siam a nih loh chuan an thiam dan anga hmalak ani tawh dawn tih an sawi.

Lirthei neitute sawi danin kawng chhiat avang hian Loan rul theilo tam tak an awm tawh an ti a, NHIDCL leh Mizoram sawrkar an phutna ah Mizoram mipuite thlawp turin an ngen tih an sawi bawk.

Nizan khan NHIDCL Director, Amarendra Kumar, tuna Mizorama cham mek chu Central YMA pisaah lengin Central YMA hruaitute nen NHIDCL enkawl kawngpui chungchang an sawiho a, Director hi NHIDCL Executive Director thar Adelbert Susngi leh OSD to CM Pu Jonathan Lalremruata ten an tawiawm a. Central YMA hruaitute chuan tunhnaia Mizoram chak lakna kawngpui, Kawnpui leh Khamrang inkar kawng chhe lutuk chu a siamthat hna chak taka thawk tura an beisei thu leh hemi chungchangah hian Union Minister of Road Transport & Highways Nitin Gadkari hnenah hma la tura ngenna an thawn thu an sawi a ni.