LAWNGTLAIAH ‘MEGA OIL PALM PLANTATION DRIVE 2025’ NEIH A NI

#ZONEWS Lawngtlai July Ni 25, 2025 Zirtawpni: Vawiin khan Department of Agriculture & Farmers Welfare, Govt. of Mizoram, bultumin Chandmary Inpui, Lawngtlaiah ‘Mega Oil Palm Plantation Drive 2025’ neih a ni a. He hunah hian Pu Cheemala Siva Gopal Reddy, IAS, Lawngtlai Bawrhsap chuan khuallian niin a hmanpui a. Khuallian hian Oil Palm chingtute hnenah pekchhuah tur Oil Palm tiak a vailiam nghal bawk.

Pu Cheemala Siva Gopal Reddy chuan kalkhawmte hnena lawmthu sawina a nei hmasa a. Oil Palm chingtuten rim taka hna an thawh avang a hlawhtlinna an hmu thin chu chhuanawm a tih thu sawiin, hmalam hunah pawh theihtawp chhuah zel turin a chah a. India ram chu hriak tharchhuahah a la intodelh lo hle a, ram dang atanga lakluh a tam avaning mahni intodelh tura ‘Oil Palm Mission’ hial din a ni, a ti. Hriak tharchhuahah India ram a intodelhna turin Oil Palm chingtute an pawimawh hle tih tarlangin, oil palm chingtuten India ram tan an thawh hlawk thei dawn hle a, anmahni tanpui turin sawrkar pawhin theihtawp a chhuah mek zel a ni, a ti. Bawrhsap chuan Mizoram sik leh sa chu Oil Palm in a ngeih hle nia ahriat thu sawiin, mi tam zawkin chîng a, hlawkna nasa zawk an chan zel a beisei thu a sawi.

Khuallian chuan Oil Palm chingtute chu sawrkarlaipui pawhin a ngaihsak hle tih sawiin, tanpuina chi hrang hrang a pek bakah ‘National Mission on Edible Oils – Oil Palm (NMEO-OP)’ hnuaiah Viability Gap Payment – a kalpui bawk avangin Oil Palm chingtute an vanneih hle a ti. Bawrhsap chuan Agriculture Department chu Nodal Department ni mahsela , department dangte pawh theihtawp chhuaha an theihna zawn apianga tanpui thin turin a chah a. Oil Palm chingtuten harsatna an neih te chu DC office ah thlen thin tura chahin, tanpui theihna apianga tanpui tura an inhawn reng thu a tarlang. Pu Cheemala Siva Gopal Reddy chuan Lawngtlaia Oil Palm chingtuten hlawk zawka an thar chhuahte an zawrh theihna turin Lawngtlaiah ngei ‘Oil Palm palm Mill’ neih a tul tak zet a ti a. Patanjali Foods Limited pawh chakzawka hnathawka an khawl te hman theih tura bunfel thuai turin a chah nghal bawk.

Pu Lalremmawia Colney, District Agriculture Officer Lawngtlai chuan thusawina neiin Mizoram Sawrkarin Oil Palm chingtute tan theihtawp a chhuah mek zel a ti a. Harsatna an tawh hrang hrangte chu sawrkarin a hriatpui tih tarlangin, theihtawp chhuah zel an nih tur thu a sawi. DAO chuan Lawngtlai District ah kumin bikah Oil Palm tiak 6297 pek chhuah tawh niin, 1400 hactre ah chin mek a ni, a ti a. Ram zau zawka Oil Palm chinng tura hmalak mek a nih thu a tarlang bawk a ni.

Patanjali Foods Limited – aiawhin Pu Lalramzaua, chuan thusawina neiin, Serchhip, Lunglei, Lawngtlai leh Siahaah an inbun mek tih a tarlang a. Oil Palm chingtute hnenah ‘ Awareness Campaign’ kalpui thinin, Vaseikai leh Udalthana- ah nursery an nei mek thu a tarlang a. Factory changtlung tak din a, a herna khawl tha tak a awm bawk chuan Oil Palm chingtuten hlawkna nasa zawk an nei dawn a ni, a ti. Lawngtlai District tan Liaphaah ‘Oil Palm Mill’ din tura chak taka hmalak chhunzawm zel a nih thu a sawi bawk.

Hun hmannah hian Oil Palm chingtute aiawhin Pu H. Nguncheuva, Bungtlang ‘ S’ Oil Palm Growers Association, Pu C. Malsawma Chamdur ‘P’, leh Pu Adi Nghalimlui, te hnen atangin Oil Palm enkawl chungchanga rawn hriat an neih kawng hrang hrangte ngaihthlakna neih a ni a. Pu Cheemala Siva Gopal Reddy, Lawngtlai bawrhsap chuan Lawngtlai RD Block , Bungtlang ‘S’ RD block, leh Chawngte RD Block hnenah Oil Palm enkawlna hmanrua a hlan nghal.

Vawiin ‘Mega Oilpalm Plantation Drive 2025’ hmanna inkhawm hi Pu Caleb Vanlalrinngama, Asstistant District Agriculture Officer (ADAO) chuan kaihruaiin, Pu B. Vanhnuna, Asst. Agriculture Inspector, chuan lawmthu sawina neiin hun a khar.