HINDI ZIRNA CHUNGCHANGAH INRAWNKHAWM A NI

#ZONEWS Aizawl July 25, 2025 Zirtawpni: Vawiin khan Mizoram Education Reforms Committee buatsaih Hindi zirna chungchanga inrawnkhawmna School Education Directorate Conference Hall-ah neih a ni a, Hindi zirna lama thawktute leh mithiamten Hindi zirna tihhmasawnna tur kawng hrang hrang an sawiho.

Pi Angela Zothanpuii School Education Director chuan he inrawnkhawmnaah hian Hindi pawimawhna sawiin Mizoram pawnah Hindi pawimawhna a lo lang chiang thin a, School tha tak takah pawh Mizo naupangte an kal hian an buai thin, puitling pawh Hindi thiam lo chu hnamdang zingah kan buai thin a ti a. Kan Hindi zir dan hi insiamthat tulna a tam hle a, he inrawnkhawmna hi a pawimawh hle a ni a ti.

Rev Dr K.Thanzauva Education Consultant chuan thusawiin He inrawnkhawmna buatsaih a nih chhan chu engtin nge Mizo Zirlaite hi Hindi-a tha taka kan tawng tir theih ang? tih a nih thu a sawi a. India rama awm kan nih avangin Hindi hi official language a ni si a, kan thiam ngei a tul bawk si, engtinnge Mizo Zirlaite kan zirtir ang tih hi ngaihtuah a ngai ta a ni a ti. Hindi zirtirnaa Mizoram dinhmun tarlangin Hindi teacher 1393 kan nei a, heng zingah hian regular 538, contract 855 an ni a ti a. High School-ah 440 an thawk a, Middle School-ah 953 an awm. Mizo Zirlaite hian Hindi hi an zir nep ep avangin an thiam tak tak lo nia a hriat thu a sawi.

Prof Lalbiakdiki Hnamte Working Chairman Mizoram Education Reforms Committee chuan kan Hindi zirtir danin a thlen chin leh duhthusam lohna laite a sawi a, tun dinhmunah ziak leh chhiar te thiam mah ila, a awmzia kan hriat loh dan te, mi zingah kan tawng thiam loh dan te a sawi a, tuna kan zir dan chu a taka hmanna turah awmzia a nei tawk lova a hriat thu te, hmasawn tura tan lak a ngaih thu a sawi.

He inrawnkhawmnaah hian School Education Department officer te, MBSE, SCERT, Samagra Shiksha officer te, Education Reforms Committee Working Chairman leh member te, Hindi zirtirna hmun hrang hranga hotute, Hindi Education Officer te, Hindi Teachers Association hruaitute leh zirlai pawl hruaitute an kal khawm a ni.