Mizorama Sawrkar damdawi-in 37-in National Quality Assurance Standards (NQAS) national certificate an nei tawh.

#ZONEWS August 03, 2025: Health department hotute sawi danin NQAS nei tawh sorkar damdawi-in 37 bakah hian sorkar damdawi in 22-in state level certificate nei tawhin national certificate result nghak mek 6 an awm bawk. India rama Sawrkar damdawi in ṭha tehnaah Kolasib District Hospital a tling thar leh a. National Health Mission (NHM) Mission Director Dr. Lily Chhakchhuak hnen aṭanga thu dawn danin, India rama sawrkar damdawi in ṭha bik tehna NQAS-ah Kolasib District Hospital chu an tling thar a, tehna-ah za zelah 96 point 39 hmuin, Mizoram puma District Hospital 12 awm zingah NQAS National Certificate hmu hi 7 an awm ta a ni.

Health Minister Pi Lalrinpuii chuan India rama damdawiin ṭha bik thlan chhuah zingah Mizoram damdawiin an awm belh zel chu Mizoram tan mellung pawimawh tak a nih thu leh damdawiin, district leh state-a thawktu zawng zawng te thawhrimna leh taimakna chhuanawm a tih thu sawiin, he’ng tehna te hi Sawrkar damdawi in pantu damlote chu a chhawr ṭangkai bertu tur an ni, a ti.