REIEK AH “SENSITISATION ON SCHEMES OF NALSA & TRAINING OF NYAYA SAKHIS ON LAWS RELATED TO WOMEN” BUATSAIH A NI.

#ZONEWS Reiek July 25, 2025: Vawiin khan BDO Conference Hall, Reiek ah State Legal Services Authority (SLSA) leh Women & Child Development (WCD) te tangkawpin, Training of Nyaya Sakhis on Laws Related to Women buatsaih a ni a, he hun hi Pi Betty Lalrinfeli, Reiek BDO chuan a hmanpui a ni. Reiek Block chhunga khaw pathum (3) – Reiek, Rawpuichhip leh Kanghmun khuaa, Nari Adalat (Women’s Court) hnuaia Nyaya Sakhis te training pek an ni.

Nari Adalat-in a tum ber chu hmeichhiate’n an harsatna tawh hrang hrangte, Court leh rorelna sang zawk thleng kher lo a, Gram Panchayat /Village Council level-a inbiakna, inremsiamna, rang tak leh man tlawm zawk lo siam sak/ lo neihpui hi a ni. Hmeichhiate puala pawl awm te dikna, chanvo, khawtlang nun siam thatna leh Bana kaih (Handholding) Policy chungchanga Awareness platform atan pawh hman theih a ni.

Nari Adalat hi Aspirational District ah bul tan phawt tura ruahman niin, Mizoram ah chuan Mamit District-a Block 3, Reiek, West Phaileng leh Zawlnuam Block atanga thlanchhuah khaw 10 ah din phawt a ni. Reiek Block ah hian Training neih hmasak ber niin, khaw thlanchhuah pathum atanga Nari Adalat member ruatte hi Nyaya Sakhis vuah an ni a, khaw thlan chhuahte atang hian mi pasarih (7), VC member, NGO hruaitu, khawtlanga mi hmingtha, zirtirtu leh SHG lama hruaitute atangin thlan chhuah an ni.

He hunah hian WCD hnuaia Hmeichhiate hamthatna tur leh humhalhna Scheme hrang hrang awm te in hrilhhriatna hun neih a nih bakah Dan hnuaia Hmeichhiate dikna chanvo in hrilh hriatna hun neih a ni bawk a. Nari Adalat chungchang, an hnathawh tur leh an thuneih dan chin tur in zirtirna bakah tihchhin (practical) na hunte hman a ni a, Nyaya Sakhi te lehkha pawimawh vawn dan leh File enkawl dan te zirtirna hun neih a ni bawk a, sawihona leh zawhna hunte hmangin, he hun hi khar a ni ta a ni.