Bangalore Mizo Christian Fellowship (BMCF) chuan an Golden Jubilee chu July 27, 2025 hian an lawm dawn; BMCF-a lo tel tawh thin zawng zawngte Jubilee lawm turin an sawm.

#ZONEWS Bangalore July 25, 2025: Bangalore Mizo Christian Fellowship (BMCF) chuan an Golden Jubilee chu July 27, 2025 hian an lawm dawn a. Mizo Pathian fakna hla satute kan neih that tak tak, Pu Vanlalsailova, Pi Pensy B. Lalthangliani, Tv. Lalmalsawma (Sawmtea) leh Nl. Lalhlimpuii ten an hmanpui dawn a ni.

Jubilee atana inbuatsaihnain a vawrtawp a thleng tawh a, Jubilee hmang turin an inpeih tawh hle a. Jubilee an hmanna hmun tur UTC-a hmunhma vel pawh an tifel tawh a. Jubilee hmanna tura inbuatsaih nan hian vawi eng emaw zat hnatlang pawh an ko nghe nghe a ni.

Bangalore Mizo Christian Fellowship-a lo tel tawh thin zawng zawngte he hun hmang tur hian an sawm a. Pathian fak leh chawimawiin, hun hlimawm leh chhinchhiah tlak hman ngei tumin an inbuatsaih a. Jubilee lawmna hi Jubilee hma ni chiah July 26, 2025 zan atangin a urlawkna nen an hmang tan dawn a. Pathian fakin, zaithiam an chah chhuahte nen hlim takin Jubilee lawmna bul tan an tum a ni.

Hmundang atanga Jubilee lo chhim duhte tan BMCF YouTube channel (https://www.youtube.com/@bmcfmediaministry) kal tlangin a chhim theih dawn bawk a. BMCF Jubilee ngaihvena lo chhim duh zawng zawng, a hmuna kal ve thei lote pawh Online-a lo chhima lo telpui vek turin an sawm bawk a ni.