Aizawl DC khapna thupek: Zirna-In awmna atanga yard 100 (300 ft) huamchhungah mi tumahin vaihlo atanga siam thil hrang hrang te, Sikhar leh e-cigarette (Vape) te an zuar in an hralh tur a ni lo

#ZONEWS Aizawl July 25, 2025: Aizawl District Bawrhsap Er. Lalhriatpuia chuan a hnuaia tarlan ang hian khapna thupek a chhuah.

Ministry of Home Affairs, Govt, of India chuan khawtlang mipuite kan lo hrisel zawk nan ‘The Prohibition of Electronic Cigarettes (Production, Manufacture, Import, Export, Transport, Sale, Distribution, Storage and Advertisement) Act, 2019” chu khauh takin a la kalpui zel a. Zirna-In (Educational institution) awmna yard 100 (300 ft) chhungah vaihlo atanga thil siam hrang hrang te, e-cigarettes leh mihring tana thil pawi thei te hralh leh zawrh a khap tlat a.

Chuvangin kei, Er. Lalhriatpuia, IAS, District Magistrate, Aizawl District hian sikul naupang te, zuk leh hmuam leh taksa tana thil tha lo hrang hrang laka an him theih nan BNSS Section 163 in thuneihna min pêk angin a hnuaia thupek hi ka chhuah e.

“Zirna-In awmna atanga yard 100 (300 ft) huamchhungah mi tumahin vaihlo atanga siam thil hrang hrang te, Sikhar leh e-cigarette (Vape) te an zuar in an hralh tur a ni lo”

He khapna thupek zawm lo te chu BNS Section 223 hmangin an chungah hremna lek a ni ang. He thupek hi chhuah a nih atangin thia hnih (2 months) chhung a huam ang.

He thupek hi vawiin Dt. 23.7,2025 hian District Magistrate Seal-a nemnghetin hming ka ziah hnan e.