Kolasib ah National Deworming Day hman dan tur an rel.

#ZONEWS Kolasib August 06, 2025: Vawiin khan National Deworming day, Kolasib District a hman dan tur chungchanga thutkhawmna neih a ni a. He thutkhawmna hi Dr RK Lalthlamuana, Sr CMO,Kolasib District chuan a kaihruai a, National Deworming day hmanna tur atana tul leh pawimawh sawiho a ni.

He hunah hian Dr RK Lalthlamuana chuan vawiin a an thutkhawmna chhan sawifiah in, Deworming day(Rulhut hlo pek) chu kum khatah vawi hnih kalpui thin a ni a ti a. Kumin ah khan February ah an kalpui tawh thu sawiin, a vawihnih nan August 11 hian kalpui leh tum a ni a ti. Rulhut hlo chu naupang atanga puitling thleng in kan mamawh thu sawiin, kan nitin hun hman leh kan ei leh in atang rulhut kan pai theihna dinhmun a sang hle a, chuvang chuan rulhut hlo ei chu kan in zirtir a kan uar sauh a ngai a ni a ti. He rulhut hlo, Albendazole hi a hlauhawm loh thu sawiin, ei sual leh in hal pawh a awm awm hriat a nih tawh loh thu a tarlang bawk.

Vawiinah hian thurel pawimawh tak tak sawiho niin, chung zingah chuan National deworming day hman dan tur te rel a ni a.Deworming day hi August ni 11 ah hmun hrang hrang, Hospital, College ,School leh Anganwadi ah te hman tur a ni a. Rulhut hlo pek tur kum bithliah bik hi kum 1-19 niin, school a dawng lo te pawh Asha ten anmahni pan tura ruahman a ni.

A hawnna hi Kolasib District Hospital OPD kawtah August ni 11,2025 ah neih tur a ni anga. Kumin atan hian mi 31700 hnenah rulhut hlo hi pek chhuah tum a ni. National deworming day chungchang hi social media hrang hrangah thehdarh ni se tia rel a ni bawk.

Vawiina National Deworming Day hmanna tur chungchang sawihona ahhian Kolasib District Sr CMO bakah Pi Ramdinthari, Dy CMO leh PHE, DEO, DPO, CDPO Bilkhawthlir leh DPM atangin an tel thei a ni.