KOLASIBAH DISTRICT AIDS PREVENTION AND CONTROL COMMITTEE AN THUKHAWM

#ZONEWS Kolasib July 25, 2025 Zirtawpni: Vawiin khan District Aids Prevention and Control Committee chu Kolasib Addl DC, Pi B Malsawmtluangi hovin an thukhawm a. He hunah hian Kolasib District a AIDS natna darh dan te, a darh zel loh nana an hmalakna te leh thurel pawimawh tak tak sawiho a ni.

Vawiina DAPCC thutkhawmna ahhian Chairman, Pi B Malsawmtluangi chuan AIDS leh a kaihhnawih natna te do kawngah Kolasib District in theihtawp an chhuah chu lawmawm a tih thu a sawi a. AIDS veite an pun zel loh na turin leh a vei mekte pawh ina inenkawlna ART te kim taka an lak theihna turin tun aia chak lehzual a an thawh a pawimawh hle a ni, a ti.

He hunah hian thurel pawimawh tak tak sawiho niin, chungte chu Red Ribbon Quiz Competition neih chungchangte, District Community Resource Group chungchangte leh Integrated Health Campaign 2025 te an ni.

Report a tarlan anih angin Integrated Health Campaign hi tunah hian Kolasib District ah kalpui mek a ni a. He hunah hian natna hrang hrang; HIV, Syphillis, Hepatitis B&C te leh adangte test neih niin Kolasib District a khaw hrang hrangah he Campaign hi neih a ni mek a. Heng test a an hmuchhuah natna te hi District Hospital Kolasib ah refer thin niin anni in a tul anga enkawlna an lo kalpui zui thin a ni.

Red Ribbon Quiz hi School naupangte zingah DEO Kolasib nen tangkawp a neih tura ruahman niin, a lawmman turte pawh ruahman fel a ni tawh a. Lawmman pakhatna hian cheng sangsarih an dawng anga, pahnihna in cheng sangnga leh pathumna in cheng sangli dawng tura ruahman a ni.

District Community resource group – HIV risk sang zual ho community te chungchang pawh vawiinah hian sawiho niin, he comittee hi din tawh niin remchang hmasa bera thutkhawmna nei tura ruahman a ni.

District ICTC Supervisor , Pu Lalhmingsanga’n report a pek danin tun dinhmunah Kolasib District ah AIDS vei mek, ART la mi 1310 an awm a. ART la tan ho initial viral load test vek an ni a, thla 6 hnuah an viral load test leh thin a ni bawk. 2024 April atanga 2025 June thla chhung hian HIV hrik hi mi 110 in an kai thar a, HIV hrik pai mekte zingah hian mipat hmeichhiatna atanga inkaichhawng hi a tam ber niin, za zela 81.81% a ni a. Hriau leh Syringe inhmantawm avanga inkaichhawng hi 16.36% niin, nu leh pa atanga kai hi 1.81% a ni bawk. Heng zingah hian Homosexual / bisexual kai mi 5 an awm bawk a ni.

Vawiina DAPCC thutkhawmna ahhian Addl DC bakah, Dr R K Lalthlamuana, CMO Kolasib, Dr Ramdinthari (Dy CMO), Josephine Zonunsangi (DUDO Kolasib), Lalbiakzuala (District Program Manager) te leh DAPCC member te an tel a ni.