Khawzawlah India Independence Day vawi 79-na ropui tak leh hlawhtling taka lawm a ni

#ZONEWS Khawzawl August 16, 2025: Nimin chawhma dar 10:00 am khan Mualvawm Field, Khawzawlah Independence Day vawi 79-na lawm a ni a, Minister of Agriculture & Farmers’ Welfare, Cooperation, I & WR Department, Pu PC. Vanlalruata chu khuallian a ni.

Minister Pu PC. Vanlalruata chuan hnam puanzar a pawt pharh a, parade contingent te chibai bukna a chhang let. Hemi zawhah hian Minister Pu PC. Vanlalruata chuan thu sawiin Khawzawl mipuite Independence Day chibai a buk a, he ni pawimawh tak, zalenna kan neih ni hmanpui tura an sawm avangin lawmthu a sawi bawk. Ram tana inpe ngam, zalenna kan tana sualchhuaktute hre reng turin mipui a chah a, zahna chibai bukpui turin a sawm. Ruihhlo laka fihlim turin mipui a fuih a, chhungte leh thiante bulah pawh he thuchah hi sawi chhawng zel turin a chah bawk. Khawzawl district chhunga department leh office hrang hrang hnathawh tha leh langsar a sawi lang a, Bana Kaih hnuai hmasawnna te, CM Special Package kalpui that thu leh Progress Partner 116 lai an awm thu te, kuthnathawktute tana hmalakna pawimawh te, works department hrang hrang hnathawh te, ruihhlo do kawnga Police leh Excise & Narcotics hmalakna te, zirna leh hriselnaa hmasawnna leh hmathlir te a sawi lang. Independence Day hlawhtling taka hman a nih theih nana hah taka hnatlang leh inpuahchahna hrang hrang nei te chungah lawmthu a sawi a, Viksit Bharat (ram changkang) a Mizoram chawisanna kawngah theihtawp chhuah turin mipui a sawm a ni.

Minister chuan Governor’s Medal mi 2 hnenah a hlan bawk a, Gold Medal hi Pu PC. Lalremkima, Assistant Sub-Inspector in a dawng a, Silver Medal hi Pi T. Lalnuntluangi, Inspector in a dawng a ni.

Parade contingent lawmman la tute hnenah Minister Pu PC. Vanlalruata chuan lawmman a sem bawk a, lawmman dawngtute chu hetiang hi an ni:

1st – Jawahar Navodaya Vidyalaya (JNV) Boys and Girls Contingent
2nd – Far East Experimental School Contingent
3rd – Presbyterian English School, Vengthar Pastorate Girls Contingent

Independence Day pual hian Celebration Committee chuan Khawzawl District chhung a Home pathum – Khawzawl Observation Home, Exodus Boys’ Home leh Little Wood Girls’ Home hnenah te leh District Hospital hnenah te tanpuina an hlan a ni.

Independence Day lawmna zawhah hian Khawzawl Deputy Commissioner, Pu K. Vanlalthiana chuan Minister Pu PC. Vanlalruata chu DC Bungalow-ah chhun dar 12:00 pm ah lo lawmin mikhual dangte nen chaw a kilpui a ni.

Independence Day lawmnaah hian Khawzawl Deputy Commissioner, Pu K. Vanlalthiana, Khawzawl Superintendent of Police, Pu F. Lalbiakzauva te bakah district office hotute leh NGO hruaitute an tel bawk a ni.