VAIRENGTE DAIA INKAH CHAMPHA VAWI 4 NA KAN LO THLENG TA RENG MAI. – K. Vanlalvena, MP (RS)

#ZONEWS July 25, 2025: Assam sawrkar leh Mizoram sawrkar ten Vairengte khaw dai Mizoram chhunga kan police out post sak thar inchuha kan inkah ni champha kan lo thleng leh ta reng mai.He inkahna ah hian Mizoram police huaisen na te,Vairengte mipui leh thalai te huaisen zia te kha kan theihnghilh phal tur a ni lo va.Huaisen taka thutlukna siam ngam Mizoram sawrkar Pu Zoramthanga kaihhruai sawrkar huaisenna kha kan hrereng tur a va ni leh zual em!!

Kum 2017 ah Bairabi khaw daiah MZP te chawlhbuk sak avangin Assam police ten zirlaite thisen chhuah khawpin an silai an rawn hmeh puah lai khan Mizoram police huaisen ten an silai an hmet puak ve ngam lo va.Bairabi Police station ah an tawm ngawi thuap a nih kha!! ASSAM police an hlauh vangin emni an silai an hmeh puah ngam loh? Ni love,an chunga thuneitu Mizoram sawrkar an hlauh avang mai a silai kap ngam lo an ni zawk!! Police leh Sipai tha leh huaisen tumahin hotute thupek a nih loh chuan Chawngzawng pakhat pawh an kap ngam ngai lo.

Kum 1994 January thla ah Vairengte Town extension road chu khatih laia Mizoram Congress sawrkar khan buldozer hmangin a laih tir a.Assam sawrkarin remti lovin kan buldozer operator/ driver chu an rawn man a.Mizoram sawrkar khan a kawnglaih hna chu chhunzawm ngam lovin a chawlh tir ta a nih kha.

Khami tum khan Assam leh Mizoram police te chu inkap mai thei dinhmunah dingin an inep ut a,boruak a tang at at hle.MZP ten Mizoram sawrkar hna chawlhsan tak Vairengte Town extension road laih chhunzawm hnatlang kan ko ta a.Mizoram sawrkar chuan remti lovin MZP hruaitute min man a,Aizawl Central Jail ah min khung a nih kha.Kei pawh B Sc Physics Honour ka exam dawn lai a ni chungin Jailah hian min khung ve a ni.

Kum 27 chhung teh meuh chu Vairengte khawpui hmar lam zauhna tura kawng laih chu chhunzawm lohin a awm ta reng a.Vanduaithlak takin kan ti dawn nge Vanneih thlak takin kan ti zawk dawn,Covid hripui avangin Vairengte Town extension road in National Highway a rawn pawhna lai tak hmun rem laia Vairengte tlangval Covid Duty post ah Assam lam Civil mi ten kum 2020 July thla ah buaina an rawn siam ta tlat a nih kha.

Covid vanga kan inkal pawh theih loh chhungin Assam lam hian tun hmaa tumahin in kan sak lohna Lailapur atanga Vairengte pan chhohna National Higway kamah in chhe te te sawm thum vel lai an rawn sa thar tlar tuarh mai hi a lo ni a.Vairengte covid duty post a Mizoram IR Covid duty te chu Assam lam civil mi ten lunga an rawn vawm avang leh chumi avanga thinur Vairengte mipui thawk chhuak te chuan Covid dutyna thlang lam Assam ram lam side a Lailapur ho in sak thar te chu an hâl sak ta hluah hluah a ni kha.

Covid duty post huam thak in, Vairengte lam leh Assam lam ten Auto ricksaw transit post atana an hman chhung khung thakin ,Assam lamin kum kha leh chen an ram chhung nia an chhal huam chhung kawng kam tlâng pawngah Mizoram sawrkar chuan Police out post thar sakna atan JCB in tlang chhip/ mual chhip chu kan laih zawl thar tir ta a nih kha.Chumi hmunah chuan Mizoram sawrkar chuan Police outpost thar sak a tum ruh hle a.Vairengte mipui ten temporary taka police duty post sakna tur thing zai leh châk engkim an lo buatsaih vek hmang chuan tlai khaw thim hnu ruah sur cherh cherh laiin Chu outpost thar a bang dâp,a chung rangva in,sethlam in chu kan tungding ta a nih kha le!!!!

Dik taka sawi chuan kha outpost thar kan sak dawn niah khan Vairengte Forest IB ah meeting kan nei a.Bilkhawthlir bialtu MLA Pu Lalrinsanga nen kan tel pui a.Kolasib DC te,Police hotu DIG Nothern Range te,MZP hruaitu Aizawl atanga lokal te,Vairengte khawtlang aiawhte nen kan meeting ho a nih kha.Mizoram Sawrkar lam official(Officer te ka tihna a nih chu) lam te kha chuan,”Khuti laiah khuan police outpost thar kan sak chuan Assam lam hian an phal dawn lo va.Buaina a thleng ngei ngei dawn a ni” tiin sak a nih lohna turin tan an khawh tlat a. Vairengte khawtlangin in sak na tur thingzai te an buatsaih vek tawh thu leh khawthim hnuah sak a nih tur thuin keini Pu Rinsanga MLA nen khawng takin kan tang tlang tlat a nih kha.Mizoram Official te chuan an hotute thupek an hmuh angin outpost thar sak tumtu te chu dan tur a nih thu leh sak luih an tum chuan man tur an nih thu an sawi a.Chutianga thupetu an hotu chu tunge a nih tih ka zawt nghal a nih kha(ka sawi thui lutuk palh ang tihte ka hlau deuh,insum teh ang).Chief Minister Pu Zoramthanga chu MLA Pu Rinsanga nen phonein kan han bia a.Vairengteah a hmuna kan awm mek thu leh Police outpost thar hi Vairengte mipuite nen sak ngei ngei kan tum thute,Sawrkar official lam ten an hotu ten an rem tih loh thu an sawi tlat thute kan han report nghal vek a.A tul a nih chuan he kan thil tih dodaltu Officer te chu vawiin office hour ral hma ngeia Suspension order chhuah a tul thute thlengin CM hi kan han sawi pui a nih kha.Kan Chief Minister chuan,”Political Issue a ni a,sawrkar hnathawkte thu lo neih phakna tur chi a ni lo.Tha in tih ang khan kaltlang pui rawh u” a rawn tih tak avangin Vairengte mipui te nen ruah sur khawthim karah khu Police outpost thar khu kan tungding ta a nih kha.

Kum 2021 a lo inher chhuak a.Assam nena kan inrina hmun hrang hrang Mamit District chhung a Thinghlun leh Chuhvel ah te,Kolasib District chhunga Bairabi ah te,Phaisen ah te,Vairengte ah te,Phainuam ah te,Buarchep ah te Assam lam chuan buaina an rawn siam hmasa ta zel a nih kha.

A hma kum August thlaa Police Outpost thar kan sak tâk chuan Assam Sawrkar mit a timim em em a.Kum 1994 January thla a Vairengte khawpui hmar lam zauhna tur kawng laih chawlhsan tak ai pawha thlang zawk Assam lam hnaih a nih avang khan thiat leh turin Mizoram sawrkarah ngenna an rawn siam thin a.Keini lamin thiah leh mai tum ahnêkin kan police te outpost nghet atan kan bengbel tlat a.A tira a bang dâp a kan sak kha Tile bangin in dangte kan sak belh ta deuh deuh zawk si a ni.

Kum 2021 July ni 26( vawiin ni ang hi) a rawn her chhuah meuh chuan Assam ho chuan kan police out post thar chu min chhuh sak tumin a siruk lain an rawn thawk chhuak a.Kan police te lo inring lo lai chu chawhma dar 11 velah an rawn luahlan a,an thut chilh ta mup a nih kha.

Chhuak turin thu tha tinrenga kan ngenna an ngaihpawimawh loh avangin Mizoram sawrkar chuan thutlukna huaisen tichhuakin kan outpost chu tlai dar 5 dawn ah kan police huaisen te hmangin kan la let leh ta a nih kha.Khatiang thutlukna huaisen thlak Mizoram sawrkarin a siam hma leh a siam dawn laia mipui ten kan hriat phak loh thil tam tak a awm a.Zing dar 11 velah Assam police ten kan outpost sak thar,kum khat chiah lo ding tawh chu min rawn luahlan tan a.Tlai lam dar 4.30 vel ah inkah kan tan a.Hemi inkar darkar 5 chhunga thu kal lam leh haw lam zawng zawng hi chu ka ziak lo rih zawk ang.Mizoram police te that zia te,Vairengte mipui huaisenna te chu kan hriat tlan theuh kha ti ruuu!!!

Assam nena kan inkah thu chuan Social media a luah hnehin India rama Tv hrang hrangah te an tichhuak chuaih chuaih a.Khami zan la la khan India ram a fan chhuak hneh hle.Mizoram police ten an Indian pui Assam police paruk leh civil mi pakhat an kap hlum a,silai tha LMG hmangin an khua leh tui pui an kap tih kha India ram media te ân hlapui ber a ni khami zan leh a tuk zing kar zawng zawngah khan.

Parliament session lai a ni a.July ni 27 ni chawhma dar 10.40 ah Parliament gate chhung ka lut chiah tihin Media lam mi engemaw zatin an Camera nen min lo hual nghal tuau tuau a.Mizo ipte chei ak chunga parliament house kal thin ka nih avang hian min lo hre mai hlawm ni tur a ni.

Khami nia Parliament gate ka lut chiah kha min lo hmutu apiang te khan huat melh hian min melh vek mai ni hian ka hre ber.Assam ho kha an tan zawk vekin keini kha min dem rawn ti ila a sual tampui lovang.Media ho bulah tawng duh lovin ka kal pel zêl a.Min um ruih ruih a,thenkhatin min tlan pel thûl.Enge an sawi hriat theih mang si lohin thenkhat an râk chél chûl a.Parliament house chhung luhna kawngka pui ka lut tep tihin paltlang leh pehhel harsa khawpa min hual chep tâk avangin ka ding ta a .Ka hma zawn taka ding chuan zawhna dengkhawng tak min pe nghal a.”Assam police paruk leh civilian pakhat in that a.In indian puite kah nan silai tha LMG in hmang bawk a.Assam Chief Minister Himanta Biswasharma chuan Mizoram riah sipai tha Commando sang li ka tir nghal dawn a ti a,engtinnge in lo tih ang?” tiin min zawt a.”An lokal leh a nih chuan kan that vek ang” tiin ka chhang pawp a.Ka kal nghal nal nal!!! Tawng zui leh tur thu dang ka pai hauh lo khami ni khan.

Kum 1994 January thlaa Vairengte Town Extension Road laih chhunzawm ngam loh pawh tunah chuan Vairengte khaw chhung a lo ni ta.In thar tam tak a lo ding thei ta te hi a lawmawmjn Vairengte mipui te duhsakna sang ber ka hlan e!!

Heng thil hi kan dama a rem chang a nih chuan chipchiar zawkin ka la ziak ang.Duhtawk phawt teh ang.