MBA OFFICIAL CHAMPIONSHIP 2025 ZAWH FEL A NI

#ZONEWS July 26, 2025:
July ni 22 atanga ni 25, 2025 chhung a Mizoram Badminton Centre, Zuangtui a neih, Yonex-Sunrise P.C. Gabriel Lalliansanga Memorial MBA Senior Official Championship 2025 chu tluang takin zawh fel a ni ta. He tournament lian leh kum khat chhunga badminton inelna ngaihhlut hlawh ber ah hian Men’s singles ah Vanlalmalsawmzela, Serchhip a champion a, hmeichhe lamah nikum a champion tawh, H. Lalrinhlui’n a lallukhum a humhim bawk. Tournament hi Saron Badminton Club leh Mizoram Badminton Association te buatsaih a ni.

OFFICIAL CHAMPIONSHIP IN NGAIHVEN A HLAWH

MBA Official Championship hi chi hnih ah then a niin, Senior leh Junior Category-ah te a hrangin inelna neih a ni a. Badminton Association of India (BAI) pawmpui inelna a niin player tha pawh an inlan kim hle. Senior Official Championship khel turin India ram hmun hrang hranga coaching kal mek te pawh an rawn haw khawm a. Inelna boruak sang tak leh nung tak neih a niin, MBA YouTube channel ah live a pekchhuah thin a ni.

MEN’S SINGLES-AH CHAMPION THAR

Ngaihven hlawh ber inelna Men’s singles final-ah Vanlalmalsawmzuala, s/o Lalkhawpuia (L), Serchhip Vengchung, New Serchhip Badminton Club tana khel leh Malsawmhlua, s/o Albert Lalnunhlima, P&E Veng, Serchhip, New Serchhip Badminton Club tan tho a khel te an intum a. Final lut te hi Under-19 player ve ve an niin, senior category-a vawi khat final an luhna ve ve a ni bawk. Vanlalmalsawmzuala (Sawma) hian semifinal-ah tournament-a seeded no 1 leh champion lai, Saitluangpuia Sailo a hneh a, tin, Malsawmhlua (Mama) pawhin semifinal lehlam ah Junior player tha leh hming chher mek, Sainunmawia Sailo a hneh ve bawk. Final thleng tur hian tun dinhmun a Mizoram player tha ber berte an hneh a ni.

Final inkhel hmuhnawm takah Mama a chungnung hmasa zawk a, 23-21 in first game a la. Second game-ah Sawma rawn insiam tha in, 21-17 in a rawn la let veleh a. Deciding game hmuhnawm takah Sawma’n tharum a ngah zawkna leh thluak fim zawk a neih rawn hmang tangkai in, 21-14 in a chak leh a, MBA Senior Official Championship Men’s singles category a champion thei mi tlemte zingah a hming ziah luh thar a ni.

WOMEN’S SINGLES-AH RINHLUI

Nikum lamah MBA Senior Official Championship a Champion thei naupang ber nihna record a lo siam tawh a. Kumin ah pawh H. Lalrinhlui, d/o H. Zohmangaiha, Chanmari West, tuna Chanmari Shuttlers Club tana khel mek chuan a champion no mawi a humhim, kum 16 leh thla 2 chiah a la ni. Hei mai a ni lo, tun tournament hi Rinhlui tan tournament chhinchhiah thlak a ni a, category pathum ah final lut in, pahnih ah a champion!

Tin, final-a Rinhlui tumpui, Tirza Lalremruati, d/o Lalhmachhuana, Kolasib Hmar Veng, Sihphir Badminton Club tana khel mek hian kum 13, thla 6 leh ni 12 mi chiah niin final a lut a. Mizoram Badminton Association in Senior category-a tournament a siam tawh ah final thleng thei naupang ber record a rawn siam bawk a ni.

Semifinal ah Rinhluii hian seeded no 2, Laldingpuii a hneh a, lehlam ah Tirza-i’n National Centre of Excellence, Guwahati-a awm mek, Lalrempuii a hneh bawk, a first match ah seeded no 1, Lalrinhlui a vaw thla nghe nghe. Final inkhel ah Rinhlui’n experience nei zawk anih lantir in, 21-8, 21-11 in, awlsam angreng takin hnehna a chang a, a lallukhum a humhim.

Rinhlui hian Women’s singles bakah Women’s doubles leh Mixed doubles-ah te final a lut tel a. Women’s doubles-ah Lalrempuii, New Serchhip BC nen inkawp in, final-ah Ramngaihzuali leh Zoramthari (SPBC) te inkawp chu 21-17, 21-16 in an hneh a, an champion bawk.

DOUBLE CHAMPION SAINUNMAWIA

Tun tournament-a hming langsar ber zing ami chu Sainunmawia Sailo, s/o Saizama Sailo a ni. Ramhlun Venglai a awm a niin, Sihphir Badminton Club tan a khel a, tun tournament-ah hian category 2-ah final lut in, a champion ve ve.

Men’s doubles-ah Mawia hi a û, Saitluangpuia Sailo nen an tangdun a, champion lai leh seeded no 1 ni bawk, Joseph VL Ringngheta leh C. Lalramzauva te inkawp nen final hmuhnawm bik leh mit ti tlai tak an khel.

First game-ah Mawia te unau hi 21-13 in, awlsam angreng takin an chak a. Second game-ah Jojo-a leh Ramzauva te insiam tha in, 22-20 in an rawn chak veleh thung. Hemi hnu hian deciding game hmuhnawm leh chhinchhiah tlak tak an khel a, an duce zak zak hnu ah 24-22 in, Mawia leh Tluangpuia te unau chungnung zawk ah an tang a, MBA in Men’s doubles champion thar a nei ta a ni.

Mixed doubles final-ah Sainunmawia Sailo leh Zoramthari (SPBC) te tangdun chuan Vanlalhruaia Sailo (Chaltlang BC) leh H. Lalrinhlui (CSC) te tandung chu 21-19, 21-13 in an hneh leh bawk. Mawia partner, Thartei hi tun tournament-ah hian category pahnih ah final a lut bawk a ni.

CHHINCHHIAH TLAK INELNA

Tun tum MBA Senior Official Championship-ah hian Men’s doubles category tih loh category dang zawng zawnga final lut te hi Junior Category player-te vek an ni a, final lut thei naupang ber record thar siam a ni bawk.

Heng player naupang tak tak te hi PGBA, ITM University leh NCE, Guwahati a training nei mek te an ni a, chung kar ah chuan Men’s singles category-ah junior category player tho, Serchhip lama a û in coaching a pek mek a rawn champion nawlh bawk a ni. Tin, he tournament hi Pu PC Lallawmsanga, IPS (Rtd) te chhungkua in nikum lama hun lo taka boral ta, a fapa PC Gabriel Lalliansanga hriat reng nana an sponsor a ni.

Karleh lam hian NEXA MBA Junior Official Championship 2025 chu neih chhunzawm tur a ni a, hei hi MSSC Golden Jubilee lawmna tournament tur a ni dawn a, MBA Official YouTube channel lamah live a rawn pekchhuah leh thin tur a ni ang.

RESULT KIMCHANG

Men’s singles:

Champion: Vanlalmalsawmzuala, NSBC

Runners-up: Malsawmhlua, NSBC

Women’s singles:

Champion: H. Lalrinhlui, CSC

Runners-up: Tirza Lalremruati, SPBC

Men’s doubles:

Champion: Saitluangpuia Sailo & Sainunmawia Sailo, SPBC

Runners-up: Joseph VL Ringngheta & C. Lalramzauva, MBC

Women’s doubles:

Champion: H. Lalrinhlui, CSC & Lalrempuii, NSBC

Runners-up: Zoramthari & Ramngaihzuali, SPBC

Mixed doubles:

Champion: Sainunmawia Sailo & Zoramthari, SPBC

Runners-up: Vanlalhruaia Sailo, CTBC & H. Lalrinhlui, CSC

Issued by:

Media & Publicity, MBA