Commerce & Industries Minister Pu F. Rodingliana’n Aspirational Block intihsiaka Ngopa block-a hnathawk thate lawmpuina a hlan

#ZONEWS Saitual July 28, 2025: Vawiin khan NITI Aayog hnuaia Aspirational Block te hmasawnna tura inelna ‘Sampoornata Abhiyan’-a Ngopa block atanga hnathawk thate lawmpuina hun ‘Sampoornata Abhiyan Samman Samaroh’ chu Saitual Auditorium-ah neih a ni a. He hunah hian Commerce & Industries changtu Minister Pu F. Rodingliana chu khuallian niin hun a hmanpui a, lawmpuina a hlan nghal bawk a ni.

Vawiin inkhawmah hian Minister Pu F. Rodingliana chuan thu a sawi a, NITI Aayog-in Aspirational Block te hmasawnna tura inelna- Sampoornata Abhiyan a buatsaihah Ngopa RD Block chu a ti tha ber leh Mizorama NITI Aayog tehfung/parameter paruk (6) te tihlawhtling vek thei Aspirational Block awm chhun a ni chu lawmawm a tih thu a sawi a. Khuallian chuan he dinhmun thleng tura kaihruaitu District Bawrhsap leh a thawhpuite, BDO leh Line Department dang Health, ICDS leh Agriculture-a an hotute leh frontline workers te chu a lawmpui thu sawiin, an thawhrimnate avangin lawmthu a sawi bawk.

Minister chuan Ngopa block chu block hnufual, chawikan ngai aspirational block a ni reng tur a ni lo, a ti a, he dinhmun atanga tal chhuak tur chuan kil tinah tanho a ngaih thu a sawi. Khuallian chuan Ngopa RD Block-a khaw tinah hmun dang aia thlai tha duh bik leh tui bik te chu ching uar a, hlawk zawka hralh sum a chantir turin hma an la mek, tih a sawi a, Tuisa link road te pawh siam mek niin, tun dinhmunah Mimbung, Teikhang leh Hrianghmun atanga pan theihin link road zau tak an lai zo tawh tih a sawi a, tihchangtlun zel an tum thu a sawi bawk.

Minister chuan Ngopa damdawi in (CHC) leh Quarter sakthatna tur pawisa sawrkar atang a awm tawh tih a sawi a, hna chu tan mai theih a ni tawh tih sawiin, hei bakah hian Mizoram Sawrkar chuan District tinah ICU khum dah vek turin hma an la bawk tih a sawi. Pu F. Rodingliana chuan Self Help Group te tualchhung kutkawih leh tharchhuahte phochhuahna exhibition ‘Aakanksha Haat’ buatsaih a ni chu lawmawm a tih thu a sawi a, local product te nasa takin thehlar a tul a ni, a ti. Commerce & Industries Department chuan tualchhung kutkawih local product zawrh chhuahna hmun tur Mall lian MINECO, Aizawlah sa turin hma a la mek tih a sawi a, an tihpuitlin theih chuan Mizoram hmun kilkhawr bera tualchhung kutchhuakte phochhuahna tur tha tak a ni thei dawn a ni, a ti.

Sampoornata Abhiyan Samman Samaroh-ah hian Minister Pu F. Rodingliana chuan thu a sawi a, Saitual Bawrhsap Dr. Lalngura Tlau chuan inlawmna thu sawiin, Pi Dorothy Muansangi, SDO(C) & BDO, Ngopa hnen atangin report kimchang ngaihthlak a ni bawk. Pi Christina Lalnunfeli, SDC chuan lawmthu sawinain hun a khar a ni.

Chawhma inkhawm zawhah ni thum chhung- 28th July atanga 30th July thleng awh tur tualchhung kutkawih phochhuahna exhibition ‘Aakanksha Haat neih chhunzawm a ni a, Self Help group te leh tualchhung mi ten an thil siam te chu mipui lei theih turin an pho chhuak a ni. Hei bakah hian DC Office atang Aadhaar update, Income, Residential, Tribal Certificate, etc te a thlawnin a siamtir theih a, Health department atang BP leh Blood sugar te a thlawnin a check tir theih bawk a ni.

A hnuaia tarlante hi Sampoornata Abhiyan hnuaia chawimawina dawngtute an ni

Health Sector hnuaiah:
1. Lalrintluangi Pachuau, Medical Officer, Ngopa
2. Lalawmpuia, Health & Wellness officer, Ayush
3. Niangkhanchingi, ASHA, Kawlbem
4. F . Lalngaihzuali, ASHA Ngopa
5. PC Lalhlimpuia, HW/ANM, Hliappui HWC

Agriculture Sector hnuaiah

1. Hmangaihthangi Renthlei, DAO, Ngopa
2. Lalrindiki, ADAO, Ngopa
3. Lalthuamluaia, Asst Agriculture Instructor, Ngopa
4. Lalchhuanmawia, Asst. Agriculture Instructor, Ngopa
5. AC. Lalroenga, Gram Sevak, Ngopa

Nutrition Sector hnuaiah:

1. V. Lalhmingliana, DCPO, Ngopa
2. Vanlalhriathlui, Anganwadi worker, Ngopa I
3. C. Lalrinfeli, Anganwadi worker, Ngopa V
4. Rotluangpuii, NE Khawdungsei III
5. Chawngthanpari, Saichal III

Social Development Sector hnuaiah

1. Dorothy Muansangi, SDO (C), BDO Ngopa
2. V. Valminthang, Cluster Coordinator, BDO office Ngopa
3. J. Lalhmangaihzuala, Cluster Coordinator, BDO office Ngopa