Chawngte-ah Cheng Nuai 6 chuang man ruihhlo thahnem tak halral a ni.

#ZONEWS July 19, 2025: Nimin khan Chawngte Area Anti Drug Squad chuan Chawngte playground bulah ruihhlo an man te tihralna hun hmangin Chawngte SDO(C) Pu Lalnunpuia Renthlei in a hman pui.

Chawngte Area Anti Drug Squad Chairman, Pu C. Lalhmunmawia chuan ruihhlo halralna inkhawm a kaihruai a, Mizoram Sorkar chuan Ruihhlo do turin khaw tinah Village Level Task Force on Ruihhlo do Committee din tura a tih angin Chawngte ‘P’ ah din a ni a, sawt zawka Chawngte khawpui chhunga ruihhlo do anih theih nan Chawngte Area Anti Drug Squad chu May ni 3, 2025 khan din chhunzawmin chak taka hmalak a ni a ti. Ruihhlo chi hrang hrang Zu, Drug leh Ganja te man a ni a, Damdawi leh Ganja te chu him taka dah khawmin vawiin hian kan hal ral dawn a, Zu kan man tam takte chu tihchhiat nghal zel a ni thung. Nimin halral tur ruihhlo an man zawng zawng hi Rs.6,98,000/- man hu nia chhut a ni a, hetiang zat ruihhlo man thei tura tha leh zung sengtu zawng zawng hnenah lawmthu a sawi a ni.

Chawngte SDO(C) Pu Lalnunpuia Renthlei chuan thu sawiin, Hetiang zat Chawngte ah ruihhlo man nih hi lungchhiatthlak a tih thu sawiin man chhuah a nih erawh lawmawm a ti hle a. Chawngte Area Anti Drug Squad te thawhrimna leh inpekna te chu lawmawm a tih thu sawiin, kan thalai ruihhlo in a tih buai te chhanchhuak turin theihtawp chhuah zel turin a fuih a, tanpui an ngaihna pianga tanpui turin a inpeih reng thu a sawi a. Ruihhlo an man te chu a hal ral nghal a ni.

Ruihhlo halralna inkhawmah hian tlawmngaipawl hrang hrang hruaitute leh Police Department aiawh ten thusawina an nei.