BLACK-A PETROL ZUAR TEN MIPUI MIN CHHANHIM THIN A LO NI DAIH A. AN ZAWRHNA HMUN A DIK LO MAI PAWH A. CHUTI LO CHU COUPON NEI THEI MI CHUNGNUNG HOIN MIN DAWLH ZO THO DAWN SI – Ruatfela Nu

#ZONEWS #MIMAL_NGAIHDAN July 28, 2025:
Kawng chhiat vang leh chhan dang dang vangin tuialhthei kan harsa/tlachham fo thin a. Pump ah- No diesel & petrol tih leh only coupon tih an lo tar kuau a, a bulah black in duhtawk tawk lei tur an lo zuar tlar tuar a, chu chu Mizoram kalphung a ni. Zahthlakin!

Eng tik ni leh thla nge ka hre ta lo; kumin chu a ni tih ka hria. Aizawl district bawrhsap/District Magistrate chuan black a petrol zawrh a khap a, an sim lo chiang khawp mai, an sim leh ang em ka hre lo. DC/DM order te lek lek enga tan mah an ti lo a ni awm e.

Mipui mamawh thil hrang hrang, kan mamawh dan a len em vanga awmze neia sawrkarin control chunga a zawrh, (essential commodity) te hi a mumal ta lo khawp mai.
Mizoramah hian dan rorelna (rule of law) a tlusawp a, ram chhunga hnamte chu mahni duhdan danin kan sapatal vel a ni ber a, danin kori a tu si lo a, eng emaw chang phei chuan mipui hi kan tha zawk ngawt a lawm tih mai tur niin ka hria. Danin awmzia a nei lo chunga silai a puak fo lo hi kan Kristianna hian min la vawng deuh a ni mai thei e.

Tichuan, kan hriat theuh angin enge maw vanga tuialhthei a harsat hian, mipui nawlpuiin kan nghei char khawro der tawh hnuah pawh, mi thil ti thei chin chuan coupon hmangin an duhtawk tawk an la thei a, kan mamawhna a san hle chuan, coupon nei ve pha lo, mipui rethei tak takte chuan petrol pump bul setah man to zawk fein a black in kan lei thin a nih hi.

He thu ka post chhan ber chu:-Petrol Blacker ho hi ka lo haw thin a. ‘Hetianga sawrkar control thil, langsar taka black zawrh hi an zak lo em ni? Chawlhni-in biak inah an inkhawm ve thin ang em, an in chhungkhurah chhung inkhawm an nei thin ang em, Bible an chhiar ve ngai lo em ni ang tihte ka ngaihtuah thin.

Chutichuan ka’n ngaihtuah thui deuh a, black-a zuar hi awm lo ta se, sawrkar hnathawk, MLA/minister leh mi thiltithei te’n coupon hmangin an infai kelh vek dawn tho tho a. Black a zuar ho hian mipui rethei tak tak, eizawn nana mamawh ve thote min pui a lo ni zawkin ka hre ta a. Han ngaihtuah chiang ula, nge mipui rahbehna rapthlak tak, Coupon system nuaibo turin kan fight ang. Inngaihdan han sawi ve teh u.

#ZONEWS #MIMAL_NGAIHDAN HI ZONEWS NGAIHDAN A NI KHER LO