AMC AREA-A SELF HELP GROUP-TE TAN FINANCIAL LITERACY WORKSHOP NEIH A NI

#ZONEWS Aizawl July 29, 2025: Urban Development & Poverty Alleviation (UD&PA) Department hnuaia Deendayal Antyodaya – National Urban Livelihoods Mission (DAY-NULM) leh Institute of Chartered Accountants of India (ICAI) hnuaia Financial & Tax Literacy Directorate-te tangkawp chuan vawiin khan Zarkawt Community Hall-ah AMC huamchhunga Self Help Group (SHG)-te tan sum hman dan ruahman dan, khawl leh peipun dan leh inbumna laka inven dan zirhona, Financial Literacy Workshop an buatsaih a. Thupui atan ‘Smart Financial Choices for the Urban Livelihood of Mizoram’ tih hman a ni.

Pu Lalmalsawma Pachuau, UD&PA Secretary chuan ICAI nena he zirhona hun neih theih a ni chu lawmawm a tih thu a sawi a. Kan ramin sumdawnna leh eizawnna kawng hrang hranga hma kan sawn nasat thu sawiin ram thang zelah accountancy leh financial literacy lam hriat belh zel hi kan mamawh a ni, a ti a.

Mizoram Bana Kaih (Handholding) Scheme Member Secretary ni bawk, Pu Lalmalsawma Pachuau chuan SHG member-te hnenah Bana Kaih Scheme hnuaia hamthatna an dawn theihte leh hriat tur tul dangte a sawi bawk a. SHG member kalkhawmte chu dinhmun ngialnghet zawka an din theih nan an pawisa neih ang ang hman thiam a pawimawh thu chahin, zirhona hun chu hlawkpui ngei turin duhsakna a hlan a ni.

Dr. Amit Agarwal, Secretary, Committee on Financial Markets and Investors’ Protection (CFMIP), ICAI pawhin ICAI hmalaknate tarlangin, ram hmasawnna tura sawrkar nena thawhho an inhuam reng thu a sawi a ni.

Financial Literacy Workshop-ah hian SHG member 100 bakah department hotute leh ICAI mite an tel a. Pi Lalrinthari Zadeng, IEC Expert, SBM, UD&PA-in a kaihruai a. Pu Jacob Lalawmpuia, UD&PA Director chuan kalkhawmte lawmna thu sawiin, DAY-NULM hnuaiah SHG 1500, Area Level Federation 67 leh City Level Federation 10 an awm mek thu leh NULM 2.0 hnuaiah Common Interest Group 7 din a ni tawh tih a tarlang bawk a ni.

Vawiin hian Session thumah a hnuaia thupuite hmang hian financial literacy chungchang zirho a ni:

Session 1: Smart Money Planning: Savings & Budgeting
Session 2: Smart Investing Habit: Make the Most of the Money
Session 3: Fraud Prevention & Financial Safety