Champhaiah raltlan biometric lak chungchang sawi ho a ni

#ZONEWS Champhai July 29, 2025: Vawiin khan DC Conference Hall, Keifangtlangah Myanmar atanga raltlan biometric lak chungchang sawiho a ni a, Champhai Bawrhsap Pu Mohammad Aaquib chuan thutkhawm hi a kaihruai a ni.

Raltlan hi Champhaiah mi 13,586 an awm nia hriat a ni a, heng biometric hi mamawh huna raltlan awm zat hriat nan ruahman a ni. Home Department hnen atangin biometric lak nana hmanrua dawn tawh a ni a, team din a ni ang a, heng team hian Champhai khaw chhunga veng hrang hrangah kal kualin an la khawm dawn a ni. Team member te DC Office leh SP Office atangin ruat an ni a, naktukah hian inhrilhhriatna leh inzirtirna pek a ni ang a, July ni 31 hian Champhai Vengthlang, Kanan Veng leh Dinthar Veng atangin tan a ni ang. Raltlan awm zat Champhai VC te’n an thehlut ang a, team hrang hrang chuan veng an tlawh chhuak ang a, an kal ni tur te ruahman fel a ni ang. Chairman Pu Mohammad Aaquib chuan pisa hrang hrang atanga team-a tel turte tha takin ruahmanna an kalpui theih ngei a rin thu a sawi a, khawtlang hruaitu hrang hrang – VC te, YMA te leh MHIP te thawhpuina tha tak nei turin a sawm bawk.

He meeting-ah hian Addl. DC Pu K. Zorammuana, SDO (Sadar) Pu Ngulzathuama, Addl. SP Pu Victor Zothansanga leh VC leh YMA hruaitute an tel a ni.