Land Revenue&Settlement Department Minister-in Digitally-signed ROR/LSC hmasa ber hlan

#ZONEWS Aizawl July 29, 2025: Vawiin khan Land Revenue&Settlement Department changtu Minister Pu B. lalchhanzova chuan Directorate of Land Revenue&Settlement Conference Hall, Aizawlah, LR&S Department hnuaia e-RAM portal kaltlanga Digitally-signed ROR (LSC) hlanna hun chu khuallian niin a hmanpui.

He hunah hian khuallian LR&S Departmetn Minister Pu B. Lalchhanzova chuan thusawiin, ROR (Record of Rights) hlanna hun an hmang thei chu lawmawm a tih thu a sawi a. Tun hmaa LSC tia hriat than zawk ROR chu mipuite tana thil pawimawh tak tur, nakkin thlenga Mizoram hmasawnna bung thar,hriat reng tawh tur a ni tih a tar lang a. Ram chin chhinchhiahna te, ram chhiah pek te, ram lei leh hralhte chu kalphung buaithlak tak nia mipui thinlunga lo awm tawhte pawh, e-RAM portal leh Department hnuaia Tax Payment Portal-te mipuiin uar zawka an hman hunah chuan awlsam taka tih zung zung theih a ni ta chuan mipuite thinlung pawh a tha zawnga a thlak ngei a beisei tih sawiin, Mipui vantlang zingah e-RAM Portal hman tangkaina leh a pawimawhzia chu a zau thei ang bera theh darhpui turin kalkhawmte chu a chah nghal bawk a ni.

Vawiina Minister-in Digitally-signed ROR/LSC a hlante hi Pu lalchhanhima, Tuithiang Veng leh Pu H. Lalsangzuala, Chaltlang vengte an ni a. Minister vek hian kumin February ni 19 khan e-RAM portal hi a taka hman tan turin a lo hawng tawh a. e-RAM portal hmang hian mipui ten awlsam zawk leh online-in ram teh, hming thlak, ram then leh dilna hrang hrang an theh luhte chu a hmasak dan indawt zela detailment siamin, hei hi empanelled surveyor ten lo tehin portal kal tlang vek hian process leh a ni ang a. Land recording fee leh a tul dangte tihfel hnuah diltute mobile phone-ah download mai theihin digitally-signed LSC/ROR hi pek chhuah thin a ni dawn a ni.

Vawiina hun hman hi Pu Vanlalmawia, Land Revenue&Settlement Department Secretary chuan kaihruaiin kalkhawmte lawmna thu a sawi a. Land Revenue&Settlement Department Director Pu R. Lalthazuala chuan e-RAMchungchang report pein, ROR hlanin a chhunzawm nghal a. Pu C. lalchhuanmawia, DDS, LR&S Department chuan lawmthu sawiin hun hi a khar a ni.