Mizoram Apex Bank Khawzawl Branch-in Bank Day vawi 44-na an lawm

#ZONEWS Khawzawl July 31, 2025: Vawiin khan Mizoram Cooperative Apex Bank kum 44 a tlin lawm nan Khawzawl Branch chuan Khawzawl mipui te tan free taxi service a buatsaih a. Bank dawr apiangte tan refreshment an lo buatsaih bawk a ni.

Mizoram Cooperative Apex Bank hi December ni 15, 1978 khan RCS-ah register a ni a. RBI atangin BR Act, 1949 (AACS) anga Bank din phalna neih a nih hnuin July 31, 1982 khan Bank hi Mana & Sons Building, Upper Bazar, Aizawlah a hun laia Chief Minister Brig. T. Sailo chuan a hawng a, Bank hnathawh tan a lo ni ta a ni. Bank din tirh hian Chairman Pu C. Vulluaia, MD Pu MV Nataraj, Chief Accountant Pu VG Reddy te ho hnuaiah thawktu 18 an awm a, Bank Logo duangtu hi Pi Caroline Zaii a ni.

Mizoram Cooperative Apex Bank in a Board of Directors thlanna neih hmasak ber hi February 26, 1992 khan a ni a. Hemi hma hian Mizoram sawrkar ruat BoD te kutah a awm thin a ni.