Lungleiah Bawrhsap hovin District chhunga zirna kaihhnawiha hma lakna hrang hrang thlir ho a ni

#ZONEWS Lunglei October 13, 2025: Vawiin khan Lunglei District Bawrhsap Pi Navneet Mann hovin a hna thawh pindanah Lunglei Deputy Commissioner (Bawrhsap) hma laknaa Lunglei District leh Lungsen Aspirational Block-a zirna tihhmasawnna tur hma lakna hrang hrang kalpui mekte thlir ho a ni.

He hunah hian DC Office, Education, UD&PA leh I&PR official-te leh Lungsen BDO te an tel a. Hma lakna hrang hrang report ngaihthlak niin, hma lak zui dan tur rawtna hrang hrang sawi ho a ni.

Book Nest Initiative hnuaia Lungsen Aspirational Block-a zirlaite tana zirlaibu leh thawnthu bu hlui khawn khawm mekah Lunglei Sub-Headquarters YMA hnuaia Lunglei khawpui chhung YMA branch 19 aṭangin lehkhabu 11,034 dawn tawh niin, Lungsena YMA branch pathum aṭangin lehkhabu 50 vel, UD&PA aṭangin lehkhabu 400 vel leh AstroScape neitupa, Pu Aryan Mishra hnen aṭangin lehkhabu 64 dawn a ni a; a zavaiin lehkhabu 11,500 chuang khawn khawm a ni. Lehkhabu thawnna tur Lungsen Block-a sikul hrang hrangte’n lehkhabu chhuar (bookshelf) an siam zawh tawh thu tar lan niin, lehkhabu hi kar leh chhungin thawn chhuahna hun buatsaih tum ni se, tih a ni.

Zirna in dinhmun chhinchhiahna, UDISE portal-ah Lunglei District-a zirna in hrang hrang dinhmun chhut luh mek niin, October ni 30, 2025 hmaa zawh fel beisei a ni a. Vohbik zirlai naupang (Children with Special Needs – CwSN)-te puala zirtirtu training buatsaih chu 100% zawh fel vek a ni tawh a. Lunglei, Lungsen leh Tlabunga vansang chanchin zirna hmun bik, Cosmic Class (Astronomy Lab) buatsaih chu thuneitute ruahmanna angin a chhehvel sikul te’n tlawh ṭhinin, tluang taka kalpui zel a ni.

Lungsen block-a primary sikul thlan bik 10-a zirlaite tana English bulṭhut zirna, English Language Foundation (ELF) kalpui mekah naupangte hmasawn dan enchhinna hmasa ber (first assessment) chu October ni 23 & 24, 2025-ah buatsaih tum a ni a. Naupang a laklawha zirna bansan (dropout)-te’n zirna an chhunzawm leh theihna tura hma lakna Learning Bridges hnuaiah Lungsen Block-a dropout zirlai 32 zinga 19 chuan sikul kal zawm leh tawhin, Disha Foundation aṭanga thirsakawr (bicycle) dawnte chu dropout zirlaite hnenah hian sem tawh a nih bakah, thirsakawr mamawh belh dan chu Disha Foundation-ah thlen leh ni se, tih a ni a. Naupang sikul kai lote report-na tur QR Code siam chu theh darh a nih thu leh sawrkar office hrang hrangte pawhin an office-ah an tar thu tar lan a ni bawk.

Lungleiah Bawrhsap ruahmannain “Ni khat atan Bawrhsap (Be DC for a Day)” tih hun chu hlawhtling taka buatsaih a nih bakah, Lungsen leh Tlabungah te “Ni khat atan BDO (Be a BDO for a Day)” tih chu buatsaih a ni bawk a. Lunglei leh Bunghmun block-ah te “Be a BDO for a Day” tih hi buatsaih leh tura hma lak ni se, tih a ni.

Project Period Pride hnuaiah hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual health & hygiene) chungchang inzirtirna chu Rangte, Phairuangkai leh Lungsenah te buatsaih tawh niin, hmun danga buatsaih chhunzawm turin Education Department lamin ruahmanna lo siam se, tih a ni a. Money Wise hnuaia sum hman leh enkawl dan inzirtirna (financial literacy) pawh sikul ṭhenkhatah buatsaih tawh niin, Lungsen BDO ruahmannain Putlungasih leh Zawlpuiah te October thla chhunga buatsaih chhunzawm tum a ni.