Khawzawl DDMA chuan Sub-Headquarters YMA te hnenah Disaster bungrua an hlan

#ZONEWS Khawzawl August 01, 2025: Vawiin chawhma dar 11 khan DC Auditorium Khawzawlah District Disaster Management Authority (DDMA) khawzawl chuan Sub-Headquarters YMA te hnenah chhiatrupna lo thlen a hmalakna tur bungrua chi hrang hrang hlanna hun an nei a, DDMA Chief Executive Officer Pu Lalfakzuala chuan a kaihruai.

Khawzawl Bawrhsap leh Chairman, District Disaster Management Authority (DDMA), Khawzawl ni bawk Pu K. Vanlalthiana, chuan YMA pawimawh zia sawiin, Mizoramah chuan YMA te telloa sawrkar a kal tak tak theihloh thu a sawi a. Khawzawlin District a nih hnua chhiatna lo thleng tawhte ah Sub-Headquarters YMA te nena thawhhona tha tak an neih thinna ah lawmthu sawiin, Sub Headquarters YMA, Khawzawl tan chhiatna lo thlen thulha hman tur bungrua chi hrang hrang semna hun a nei a, chhiattawk te leh a chhehvel a mite tan a heng te hi tangkai taka hman a nih a beisei thu a sawi a ni.

Sub Deputy Commissioner Pu R. Lalrinhlua’n report pein, heng bungrua chi hrang hrang; Hruizen 20 mm 50 mtrs – 3 nos., Safety Helmet – 15 nos., Torch Light – 9 nos., Stretcher – 3 nos., Head Torch – 2 nos., Bawngtuthlawh – 7 nos., Suahdur – 7 nos., Telescopic Ladder 12 ft – 1 nos., Reflective Vest – 15 nos. te pekchhuah a ni.

Pu PC Rosiama, President, Sub Headquarters YMA, Khawzawl chuan thu sawiin; Khawzawl District Disaster Management Authority (DDMA) in bungrua an pekchhuahte chu a nihna tur ang taka tangkai taka hman a nih tur thu sawiin, lawmthu a sawi a. DDMA nen tangkawpa Training te pawh ngawrh lehzuala neih a duh thu a sawi tel bawk.

He hunah hian Sub-Headquarters YMA Khawzawl OB te leh Khawzawl town branch tin aiawh te kim takin an tel a ni.