Saitualah District AIDS Prevention and Control Committee thu an khawm

#ZONEWS Saitual August 05, 2025: Vawiin chawhma khan DC Conference Room, Saitualah District Bawrhsap Dr. Lalngura Tlau kaihhruainain District AIDS Prevention and Control Committee an thu khawm a, Saitual District-a AIDS darh zel tur venna leh khuahkhirhna kawnga hmalak zel dan tur kawng hrang hrangte an ngaihtuahho a ni.

He hunah hian DAPCC Chairman Dr. Lalngura Tlau chuan kalkhawmte hnenah thu sawiin, HIV /AIDS darh zel tur venna kawngah theih tawp chhuah turin a sawm a, HIV/AIDS chu mipui nawlpuiah a luh tawh chuan a buaithlak tawh a ni, a ti a. Chuvangin, ven hunlai taka tha thlah lova mahni zawn theuhah ṭang tlang hram hram turin a chah bawk a ni. Chairman chuan midangte chhanchhuahna hna chu DAPCC kovah a innghah tlat avangin beidawn a thiang lo a ni, a ti.

He thutkhawmah hian Red Ribbon Quiz Competition neih dan tur te, OST Centre neih dan turte, hoarding installation tih dan turte, Mobile ICTC chungchanga hmalak mekna te leh hmalak zel dan turte bakah thil pawimawh hrang hrangte ngaihtuah a ni.

Vawiin thutkhawmah hian Dr. Zothanpari Chhakchhuak, Member Secretary, DAPCC & SMO, Pu R Lalhmangaiha, Dy DPC& DEO, Dr R Zonunmawii, DPM, DISHA, Aizawl, J.Lalrempuia, DIS, Aizawl, Dr. Tlansangzela, MO, ART, VL Hmangaihzauva, PM, Peniel DIC te bakah khawtlang leh kohhran hruaitute an tel a ni.