Lirthei a eizawng pawl hrang hrangte chuan naktuk Thawhtanni atanga ni 9 thleng NHW 306 leh 06 a NHIDCL leh Mizoram Sawrkar in Kawngpui siam lai mek chu hnathawh a chak zawk theihna tura tlan chawlh tura ruahmanna an lo siam tawh chu an kaltlangpui dawn.

#ZONEWS August 03, 2025: Lirthei-a eizawng pawl 24 inzawmkhawm Joint Committee hian Ningani khan Mizoram chak lakna kawngpui chu chak zawka siam a nih theih na’n August ni 4-9 thleng Vairengte leh Sairang inkar kawngah tlan rih loh an tum thu an puang tawh a. Sorkar lam pawhin thlawpin police te nen ruahmanna siampui an ni. Hemi chungchangah hian Kolasib SP chuan NH 06 kawng siam mek chu chak lehzual a hmalak a nih theihna tura thurel bawhzuiin thupek a chhuah nghal a. Nizan dar 7 atanga Thawhtan zing dar 4:00 thleng lirthei tangkhang zawng zawng truck ke 14 nei chin hnuailam chhuah chhohna hun hawn a ni ang a. Thawhtan zing dar 4 atang chuan HMV Aizawl pan tur chu Police Checkgate hrang hrang Vairengte, Bairabi, Saiphai Police Checkgate leh Phaisen-ah te dan vek tur a ni. Kawnpui thleng kal tur erawh chu Checkgate duty ten zawh chian hmasak a dan kher a ngai dawn lo a, lirthei ke 14 nei chin chung lam tangkhang te tan Sorkarin eitur a buatsaih sak dawn bawk a ni.

Ningani, August ni 7 zan dar ruk atangin mipui nitin mamawh tuialhthei, eirawngbawlna gas leh buhfai phurtute Kawnpui leh Khamrang inkar kawngpui-ah chhuah leh tan chauh a ní ang a. Aizawl atanga chhuk te nen an tlan dan ruahmanna siam angin an tlan thei ang a, motor nawlpui erawh Inrinni August ni 9 zan dar 10:00 atangin Kawnpui leh Khamrang kawngpui-ah chhuah leh tan a ní ang a, Aízawl atanga rawn kalte nen an tlan dan ruahmanna siam angin an tlandawn a ni.

Tlan chawlh puan hian bungraw phur (commercial vehicle) chiah a huam ang a. Bungraw inbanlet la tur a kal 407 chin hnuai lam Aizawl atangin Kawnpui thleng tlang kawng (Durtlang-Zanlawn-Kawnpui) lamah an tlan thei dawn a ni. Helai a tlan dan tur erawh police te remruatna angin a ni ang a, 407 truck leh a tiatpuite chu zan dar 10 leh zing dar 5 inkaarah tlang kawnga kal phal a ni a, kawng siam na’na hnathawk te, lirthei che vel te leh duty te tibuai thei zawng a tumah khawsa lo turin mitin te an ngen bawk a ni.