Tun thla ni 27 atanga tan tur Mizoram legislative assembly fur thutkhawm a putluh turin official resolution pakhat a lut tawh.

#ZONEWS August 03, 2025: Assembly secretariat atanga thu dawn danin fur thutkhawm laia official resolution putluh tur hi environment, forests & climate change department atanga lut, a changtu minister Pu Lalthansanga putluh tur a ni . Zirtawpni thleng kha chuan zawhna lut a la awm lova, sorkar lam atangin dan thar siam tur emaw dan dinglai siamthat tur duan lawk emaw thehluh a la awm lo bawk. Assembly inkhawm rei zawng tur leh hun hman dan tur hi August ni 6-a business advisory committee (BAC) thukhawmin an rel dawn a. BAC hi assembly speaker Pu Lalbiakzama kaihhruai niin parliamentary affairs minister bakah legislature party tin aiawhte chu member an ni.

Eptu party-te chuan assembly inkhawm lo awm turah hian Mizoram chaklakna kawngpui chhe lutukte, GST khawn tlahniam zelte thil man sang zel te leh Aizawl khawpui Thenzawl a sawn tum chungchangte auchhuahpui an tum thu an sawi a ni.