EF&CC MINISTER-IN PU S.T. SAILO ‘3RD SOLO PAINTING EXHIBITION’ A HAWNG

#ZONEWS Aizawl August 04, 2025: Vawiin khan Pu Lalthansanga, Minister, Environment Forest & Climate Change chuan Pu S.T. Sailo ‘3rd Solo Painting Exhibition’ chu S&S Art Gallery, Venghlui-ah a hawng.

EF&CC Minsiter chuan Pu S.T. Sailo-an a lemziak mawi tak tak phochhuahna exhibition a buatsaih chu lawmawm a tih thu sawi a. Artist-te hian an hun, tha leh ngaihtuahna nasa tak an sen thin thu sawiin, kan ramah lemziak hi eizawnna tlaka kan chawikan a pawimawh thu a sawi a. Minister chuan khawvelah thiamna lo sang zelin, khawl thiltihtheihna hmangin lemziak mawi tak ni awmte rawn siam mahse, heng hian artist-te hlutna a dah hniam lo va, artist-ten an ngaihtuahna chhungril ber hmanga an ziah chhuah lemziakte hian an dinhmun a chawisang zel zawk a ni tih a sawi a. Zofate zinga hetiang lama talent tha tak tak neite tan Sawrkar scheme Handholding Policy atangin tanpuina a dil theih tih a tarlang bawk a ni.

He exhibition-ah hian acrylic hmanga lemziak chi hrang hrang 36 phochhuah an ni a, August 9 thleng chawhma dar 10 atanga zan dar 8 thleng a tlawh theih a ni. Exhibition neihna hmun S&S Art Gallery hi Information & Public Relations Department nen tangkawpa din a ni.

Pu S.T. Sailo hian kum 2016 leh 2023 khan Mizormah Solo Painting Exhibition a lo nei tawh a. Mizoram pawnah pawh a hnuai tarlanahte hian exhibition a lo nei tawh a ni –

1. From the Palette of Mizoram Art Exposition 2009, Kolkata – Organised by I&PR Dept
2. Colours of Mizoram Art Exhibition 2018, Delhi – Organised by I&PR Dept & MADS
3. Contemporary Paintings Art Exhibition 2019, Delhi – Organised by I&PR Dept & MADS
4. Colours of Mizoram Art Exhibition 2020, Academy of fine art Kolkata – Organised by I&PR Dept & MADS