Champhaiah thawnthu insawisiak buatsaih a ni

#ZONEWS Champhai August 04, 2025: Vawiin khan DC Conference Hall, Keifangtlangah Department of Tourism bultumin thawnthu insawisiak buatsaih a ni a, a thupuiah “Narrating the Tales of Mizoram” tih vuah a ni.

He hun hi SDC Pu Lalchhuanawma Ralte chuan a kaihruai a, Addl. DC Pu K. Zorammuana chuan thu sawiin Champhai District-ah hian hmun mawi leh hlu tak tak a awm a, khualzin, Mizoram pawn lam atanga lo kal te chuan chung hmun an tlawha an hlut em em chu a thawnthu, a hming an vuah chhan te leh hmanlaia thil lo thleng tawh te ngaihthlak hi a ni tih a sawi a. He thawnthu insawisiaka tel te district level leh state level thleng tur te duhsakna a hlan a, Champhai thawnthu ngaihnawm mipuiin an hriat phahna a nih ngei a beisei thu a sawi bawk.

He intihsiakah hian mi 8 an tel a, endiktute hi Govt. Champhai College atangin Asst. Professor (English) Pi Hmingsangzuali leh Asst. Professor (Mizo) Pu Malsawmdawngzuala te an ni. Lawmman la leh an lawmman dawn chu hetiang hi a ni:

1st – K. Lalvenpuii, ₹8000 + citation
2nd – Vanlallawmkima Gangte, ₹5000 + citation
3rd – C. Lalmuansanga, ₹3000 + citation

Lawmman hi Champhai Bawrhsap Pu Mohammad Aaquib chuan a sem a, thawnthu insawisiak hi Champhai tourism tana hmasawnna tha tak a ni tih sawiin mipuiin Champhai thawnthu ngaihnawm tak tak an hriat zual phah ngei a rin thu a sawi a, tel zawng zawngte an kal zelna turah duhsakna hlanin Champhai hmel tihlan mawi zel tum turin a sawm a ni.

Pakhatna leh pahnihna lawmman late hi hian August ni 8-ah State Level intihsiakah Champhai District aiawhin an tel dawn a ni.