Khawzawlah Har Ghar Tiranga Rally neih a ni

#ZONEWS Khawzawl August 14, 2025: Tukin zing dar 7 khan Khawzawl Taidawnkawn atanga DC office thleng Har Ghar Tiranga Rally neih a ni a, Khawzawl Joint VC President, Pu C. Vanlalzawna’n a kaihruai.

He hunah hian Pu R. Lalrinhlua, SDC (P) in thusawina hun a nei a. Har Ghar Tiranga campaign awmzia sawifiahin India ramin Independence a neih hlutzia te, zalenna sualtute inpekna mipuiten kan ngaihhlut thar a tulzia te leh India National Flag kan zah a kan chawimawi thiam lehzual theihna tur atan a he campaign hi buatsaih a nih thu a sawi a. India flag rawng hrang hrangin a entir te sawifiahin, India Constitution in National Flag a dah pawimawh dan te leh a diriam zawng emaw a tibawrhbang zawnga che an awm chuan a hremna dan khauh tak a awm thu te a sawi a ni. He rally a kalkhawmte hi Pu R. Lalrinhlua chuan India national flag ngai pawimawha zah thiam thar leh turin a chah a, zalenna sual chanchin hi thawnthu ang maia hre lova, zalenna sualtute inpekna te ngaihlu thar leh theuh turin a chah a ni.

He hunah hian Khawzawl Govt. High School,  Govt. MS, Govt. LF school, Govt. Higher Secondary School, PES Khawzawl te leh PES Vengthar zirlai naupangte leh zirtirtute an tel a, heng bakah hian DC staff te an tel bawk a ni.