Mizoram Chief Minister Pu Lalduhoma chuan Sawrkarin Sawhthing a lei chuan Mizo mipuite rilru a siamtha tih thu a sawi.

Chief Minister Pu Lalduhoma’n Mizoram sorkarin loneitute thar chhuah sawhthing a lei zawh sak ruala mipui rilru a siamtha chu lawmawm a tih thu a sawi a, mipui thinlungah a thlawna dawn tumna a awm tawh lova, rinawmna, taimakna, leh thawhrimna in an ngaihtuahna a hruai tawh a ni a ti.

Vawiina ZPM kaihhruai Mizoram Sorkar Bana Kaih – Thlai Thar Market hnuaia kum 2024-25 sawhthing thar hun chhung atana sawhthing lei kharna inkhawmah Chief Minister Pu Lalduhoma chuan he thu hi sawiin, Mizoramah hetianga thlai thar lei hi a tum khatna a ni tih a sawi a. Sorkarin a hralhna-ah a inrawlha rate tlahniam tur an ven sak loh chuan sumdawng inthurualte’n an lo tih fo thin angin a tirah a man sang deuh hlekin an leisak a, sawhthing market a tha ni a a lan avanga loneituten sawhthing an cho khawl teuh laiin a man an tihniam thut thin a, sawhthing an chawh khawl sa a tawih chhiat hma in, tlawm te te in an hralh a ngaih phah thin a, a ti a. Hetiang a thlen tawh loh na’n hian hma an la tih sawiin, Mizoram sorkarin sawhthing a leisak vawikhatna-ah a kum chhiat kum a thleng chuan ZPM policy thatzia pholangtu a ni a ti a, kuminah ZPM sorkar lo ta se, sawhthing hralh ngaihna hre lo tam tak an awm dawn a ti a. Mizoram sorkarin loneitute thar sawhthing a lei zawh sak ruala mipui rilru a siamtha chu lawmawm a tih thu a sawi a, sem policy a bova, mipui thinlungah a thlawna dawn tumna a awm tawh lova, rinawmna, taimakna, leh thawhrimna in an ngaihtuahna a hruai tawh a ni a ti.

Agriculture Minister Pu PC Vanlalruata pawhin thu sawiin, loneituten an thawhrim rah an tel chu lawmawm a tih thu a sawi a, lo lam thil chu buaipui tham a awm loh chuan engmah a ni lo a ti a. Loneitute tana hlawkpui tham tur, awmze neia sum an lakluh theihna turin sawhthing an buaipui angin thlai dangte pawh kalphung mumal tak hnuaia buaipui a ngai a, chutianga an tih loh chuan loneitute tan dinchhuah theih a ni lo a ti a. Hun lo awm zel turah pawh sorkarin market buaipui tham nei turin loneitute a zirtir ang a, hma an la zel dawn tih a sawi a ni.

#zonews

#chanchinthar

#tualchhung