India rama Sawrkar damdawi in ṭha tehnaah Ṭawipui South PHC a tling thar

#ZONEWS Aizawl August 14, 2025 : India rama sawrkar damdawi In ṭha bik tehnaah Ṭawipui Primary Health Centre an tel thar a, heti hian Mizoram chhunga HWC-PHC 58 awm zinga 29 chuan National NQAS certificate an nei tawh a ni.

National Quality Assurance Standards (NQAS) certified damdawi In te hi endikna chhawng thum paltlang an ni a, a tawp bera endikna an hmachhawn hi National External Assessment a ni. Hetah hian 70% an hmuh chuan certified an ni chauh ṭhin. Heng certified tawh damdawi Inah te hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi In faina leh dik taka damdawi In bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te endik an ni.

Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, National Quality Assurance Standards (NQAS)-ah Ṭawipui PHC chuan 84.78% an hmu tih a sawi.

Heti hian Mizoram chhunga Sawrkar damdawi in 42 te chu NQAS national certificate nei tawh an ni a. Tunah hian sawrkar damdawi in 19-in state level certificate neiin national certificate result nghak mek 2 an awm bawk a ni.

Health Minister Pi Lalrinpuii chuan India ram damdawiin tha tehna a tling thar Mizorama sawrkar damdawi In kan neih belh zel chu lawmawm a tiin Thawktu zawng zawng te chungah lawmthu a sawi a. Damdawiin tha tehna a tling damdawiin te hi mipui te pawhin natna enkawl theih hrang hrangte hrechiang a tangkai taka hmang turin a chah a ni.