MFA Referee Intuaitharna hun hman a ni

#ZONEWS July 17, 2025: Mizoram Football Association chuan vawiin khan Referee Seminar cum Refresher Course a buatsaih a, Mizo Football Referee ten mithiamte hnen atangin inkhel thunun dan leh a kaihhnawih pawimawh hrang hrang an zir thar.

Thara Resort, Aizawl a Seminar & Refresher Course ah hian Pu Lalrengpuia, Hony. Secretary, MFA chu khuallian niin football referee te chu inkhel boruak sang tak, entu mipui atanga nawrna leh selna nasa tak kara thutlukna tha tak siam zung zung thei an nih avangin fakawm a tih thu a sawi a. Inkhelh laia Football dan ken kawh bakah inkhel hmuhnawmna chu an kutah thui tak a awm bawk thu a sawi. Hetiang hi an dinhmun a nih vangin, referee te chu taihmak chhuah a, Football dan thar a pian belh zel anga intuaithar a, intitunlai zel turin a chah bawk.

Pu Lalbiakzuala, Chairman, MFA Referee Committee chuan Seminar hawnna hun hi kaihruaiin, tun season tharah nasa taka refereeing lamah hmalak tum a nih thu a sawi.

Pu RK Rozidinga, Secretary, MFA Referee Committee chuan report tawi pein, District FA ten tournament an buatsaih changin – an huamchhunga mi ni lo match official (referee) te an ko dawn anih chuan referee te awmna District FA bakah, a theih chinah MFA Referee Committee hriattir thin tur a ni tih a sawi.

Seminar ah hian chawhnu lamah Pu Laldawngliana, Vice Chairman, MFA Referee Committee chuan hun kaihruaiin, Pu Lalhriatpuia Sailo, MFA Referee Instructor chuan referee te pawimawhna leh mawhphurhna hrang hrang a sawi a. Pu R. Malsawma, AIFF Match Commissioner chuan Refereeing Ethics chungchangah zirtirna a pe bawk.

Seminar leh Refresher Course ah hian MFA Referee 36 an tel a, an zingah hian National Referee 6 kan neih zinga mite pawh an tel a ni.

Issued by Information, Publicity & Documentation Committee, Mizoram Football Association