Larsap Gen. Vijay Kumar Singh chuan Lai autonomous district council (LADC) chief executive member (CEM) Pu V. Zirsanga banna a pawm.

#ZONEWS Lawngtlai August 15, 2025:
Puan tawh angin Pu V. Zirsanga hian LADC MDC te zingah thlawptu a ngah leh ngah loh nimin khan fiah tur a ni a. Dar 10 leh a chanve a fiahna atana council hall-a an kalkhawm hma lawkin larsap hnenah CEM atanga a banna chu LADC chairman Pu T. Zakunga kaltlangin a thehlut a. Chairman hian a banna lehkha hi council inkhawmah hian chhiar chhuakin fiahna hun hman a ni ta lova. A banna hi nimin kha larsap chuan a pawm nghal a. Larsap hian BJP hruaitu leh united democratic alliance (UDA) legislature party-in hruaitu atana an thlan Pu N. Zangura chu LADC CEM atan a ruat nghal tih district council & minority affairs department chuan vawiin khan hriattirna an chhuah nghal a. Kar leh Thawhlehni (August ni 19) khian LADC inkhawm koh a ni a, hemi ni hian Pu N. Zangura hian MDC thlawptu a ngah leh ngah loh finfiah a ni dawn a ni.

Tun dinhmun ah LADC ah mipui thlan MDC 25 zingah MNF-in 11, BJP 2 leh pawnlam atanga thlawptu Congress Member 1 nen UDA chuan Member 14 neiin, ZPM in Member 11 an nei mek a ni.